PM Taur Hein Rezultadu Investigasaun Bá Intervensaun V-MJ ho V-MI iha SNI

Hatutan.com, (13 Outubru 2022), Díli- Primeiru Ministru (PM), Taur Matan Ruak, hein rezultadu investigasaun kle’an relasiona intervensaun hosi membru Governu na’in-rua; Vise-Ministru Justisa (V-MJ), José Edmundo Caetano ho Vise-Ministru Interior (V-MI), António Armindo bá Servisu Nasionál Intelijénsia (SNI).

Lee Mós : Vídeo Viral, Dezentendimentu SNI ho Dirijente KHUNTO Kona-bá Osan $130.000

Primeiru Ministru (PM), Taur Matan Ruak. Foto/Elio dos Santos da Costa

Vise-MI, António Armindo ho Vise-MJ, José Edmundo Caetano, akompaña sira-nia Konselleiru Másimu partidu KHUNTO, José dos Santos “Naimori Bucar” bá iha edifísiu SNI hodi buka hatene osan fíziku ho montante $130.000 ne’ebé autoridade sira halo apreensaun iha Aeroportu Internasionál Prezidente Nicolau Lobato, iha loron 04 fulan-Outubru 2022.

Osan  $130,000 hosi partidu KHUNTO nian ne’e tenta atu lori sai bá  Indonézia atu halo kompras bá nesesidade partidu KHUNTO nian hodi prepara bá kampaña eleisaun jerál 2023.  

Primeiru Ministru  Taur Matan Ruak, bá jornalista sira hafoin hasoru malu ho Prezidente Repúblika, José Ramos-Horta,  iha Palásiu Prezidensiál, Kinta (13/10/2022), hateten relasiona ho interferénsia no tentativa sira membru Governu balun bá iha servisu justisa liga ho kazu brankeamentu kapitál nia parte la halo komentáriu no entrega bá autoridade kompetente atu halo investigasaun hodi hakle’an.

“Husik bá investigasaun mak hatene no ida-ne’e mak ha’u sujere no ha’u prefere atu prosesu investigasaun mak kobre,” Taur Matan Ruak, nu’udár mós Ministru Interior hateten.

Maske iha espekulasaun públiku kona-bá envolvimentu membru Governu balun hodi interfere servisu sira justisa nian, maibé Primeiru Ministru afirma mantein fó konfiansa bá nia membru Governu sira tamba respeita bá prezunsaun inosénsia.

“Konserteza sei mantein konfiansa bá membru Governu sira ne’e tamba kaer bá prinsípiu  prezunsaun inosénsia no ita iha Tribunál para deside,” Taur Matan Ruak afirma.

Kona-bá karta hosi Vise-Ministru Interior ba iha komandu PNTL hodi husu atu ezonera Diretór Nasional Informasaun Interna servisu Nasional Intelijénsia (SNI), Ajente Xefe Polísia Gastão Piedade, Primeiru Ministru hateten, nia laiha koñesimentu no rejeita atu fó komentáriu.

“Ha’u laiha koñesimentu no komu ha’u laiha koñesimentu entaun ha’u labele halo komentáriu ba ida-ne’e,” Taur afirma tan.

Lee Mós : Kazu Osan $130.000, PCIC Remete Ona Bá Ministériu Públiku

Jornalista: Vito Salvador