Alkatiri Promete Tán 2023 Ró Haksolok To’o Timor

Hatutan.com, (14 Outubru 2022), Díli- Antigu Prezidente Autoridade Rejiaun Administrativu Espesiál Oé-Cusse Ambeno (RAEOA) nu’udár mós Sekretáriu Jerál Partidu FRETILIN, Marí Bin Amude Alkatiri, promete tán katak iha tinan foun 2023  Ró Haksolok to’o  iha Timor-Leste tamba Timor-Leste iha maioria asaun (95%) iha estaleiru figuera da foz.

Lee Mós : Taur Matan Ruak Fiar Ró Haksolok Sei Mai Timor

Mari Alkatiri to’o fali iha Timor-Leste ho zet privadu ne’ebé oferese hosi Governu Provínsia NTT. Foto/Elio dos Santos da Costa

Antigu Primeiru-Ministru Timor-Leste ne’e konsidera nia viajen bá Portugal fó susesu ba Timor-Leste tamba lori rezultadu ida dia’k tebes  rezolve no tau pontu ikus liu bá solusaun  Ró Haksolok.

Nia dehan, iha fulan oin mai, traballadór sira iha estaleiru figuera da foz hahú servisu, atu nune’e, iha tinan 2023 Ró Haksolok bele ona mai Timor-Leste.

Alkatiri hateten, solusaun di’ak tamba nia bele rezolve problema Ró Haksolok no fó solusaun bá oin tamba estaleiru ne’ebé sai hanesan indústria ne’ebé atu hakotu problema ho Ró Haksolok Timor-Leste kontrola 95% asaun, signifika katak osan ne’ebé oras ne’e Timor-Leste investe ba la’ós para hadi’a de’it Ró Haksolok maibé bele utiliza mós ba manutensaun ka halo mós ró seluk tuir nesesidade ne’ebé presiza.

“komu ita kontrola ona 95% asaun iha estaleiru figuera da foz signifika Ró Haksolok iha ona Timor-Leste nia liman, no hotu lori mai ona. Tamba ne’e bainhira Ró Haksolok hotu estaleiru ne’e sei bele uza bá halo tan servisu seluk, Ró seluk atu hadi;a karik, atu halo foun karik, no halo servisu seluk atu osan ne’e ita investe sei iha retornu bá Estadu,” Alkatiri haktuir bá jornalista sira iha Aeroportu Internasionál Nicolau Lobato, hafoin fila hosi vizita bá Portugál no Indonézia, Sesta (14/10/2022).

Eis Prezidente RAEOA ne’e hatutan Ró Haksolok sei mai atu Haksolok timoroan hotu no se mak dehan haksolok ne’e ferrujen bosok, tamba Ró Haksolok hetan sertifikasaun internasionál no empreza espesializada sira mak bá haree ona Ró Haksolok no hateten kedas katak Ró Haksolok prontu para atu finaliza no prontu para atu mai Timor-Leste.

“Ha’u to’o ona no Ró Haksolok sei mai, Ró Haksolok nia persentajen nafatin atinje 75% nune’e fó garante Ró Haksolok sei mai Timor-Leste. Ha’u lagosta promete fulan ka data, ha’u dehan tinan oin,” Alkatiri afirma.

Sekretáriu Jerál Partidu FRETILIN ne’e subliña oras ne’e traballadór hamutuk nai’n 30 mak hahú hikas servisu bá Ró Haksolok no máximu sei iha tan servisu seluk no ema tenke aumenta,  nune’e sei iha mós formasaun bá tripulasaun bá Ró Haksolok no nia sei mai ho nia tripulasaun rasik ne’ebé pelumenus 30%  to’o 50% ne’e tenke Timoroan.

Lee Mós : Alkatiri: Problema Hotu Kona-bá Ró Haksolok Rezolvidu

Jornalista: Vito Salvadór