Defeza & Seguransa
PDHJ Konsiensializa Membru UPF Respeita Direitu Umanu
Hatutan.com, (18 Outubru 2022), Díli—Provedoria Direitus Umanus no Justisa (PDHJ) konsiensializa Polísia Nasionál Timor-Leste (PNTL), Unidade Patrullamentu Fronteira (UPF), atu fó seguransa bá populasaun iha fronteira ho respeita mós bá direitu umanu ka direitu sidadaun sira-nian.
PDHJ konsiensializa PNTL, Unidade Patrullamentu Fronteira (UPF), atu fó seguransa bá populasaun iha fronteira ho respeita mós bá direitu umanu ka direitu sidadaun sira-nian. Formasaun ida ne’e rasik sei realiza durante loron lima, hahú husi Loron 17-21 Outubru 2022, iha Kampaun UPF Batugade no partisipa hosi Membru UPF na’in 25. Foto/PNTL.
Atuál xefe Gabinete PDHJ, Silvino Saldanha Pereira iha Batugade garante katak, liuhosi formasaun ida ne’e bele sai hanesan referénsia ida bá membru UPF, hodi bele aumenta sira nia koñesementu iha knaar loron-loron nian liga ho direitu umanu.
“Treinamentu ne’e sai hanesan referénsia ida ne’ebé bele aumenta ita bo’ot sira nia koñesimentu iha direitus umanus nian, nune’e bainhira fila ba ita boot sira nia fatin bele implementa,” Hatutan.com sita deklarasaun Silvino Saldanha Pereira, iha karta komunikadu.
PDHJ konsidera liña fronteira sempre akontese atividade sira ne’ebé kontra lei. Nune’e, nia husu ba membru UPF sira atu partisipa ho másimu hodi bele komprende esplikasaun hosi formadór sira kona-bá lei no direitu umanu nian, hodi bele hasa’e koñesimentu no bele implementa servisu loron-loron iha terrenu.
PDHJ agradese ba Ministériu Interiór (MI), Komandu Jerál PNTL, nomós UPF, tanba halo ona kooperasaun di’ak hodi organiza no fornese fatin bá implementasaun formasaun ne’e.
Iha fatin hanesan, Assistente Superintendente, Carlos Maia, fiar katak, liuhosi formasaun ida-ne’e, sei bele minimiza asaun fízika hosi Membru Unidade Patrulamentu Fronteira sira hasoru Komunidade.
Formasaun ida ne’e rasik sei realiza durante loron lima, hahú husi Loron 17-21 Outubru 2022, iha Kampaun UPF Batugade no partisipa hosi Membru UPF na’in 25.
Jornalista: Rogério Pereira Cárceres