Serbisu Migrasaun Asegura Sidadaun Estranjeiru Na’in-Ualu Iha Maliana

Hatutan.com, (21 Outubru 2022), Díli—Diresaun Jerál Servisu Migrasaun liu hosi Setór Operasaun Servisu Migrasaun, asegura sidadaun estranjeiru na’in-ualu tanba utiliza vistu turista hodi hala’o atividade profisionál hanesan vendedór ambulante la ho autorizasaun iha área Suku Raifun, Postu Administrativu Maliana, Munisipiu Bobonaro.

Diresaun Jerál Servisu Migrasaun liu hosi Setór Operasaun Servisu Migrasaun, asegura sidadaun estranjeiru na’in-ualu tanba utiliza vistu turista hodi hala’o atividade profisionál hanesan vendedór ambulante la ho autorizasaun iha área Suku Raifun, Postu Administrativu Maliana, Munisipiu Bobonaro. Foto/PNTL.

Ekipa operasaun Servisu Migrasaun ne’ebé lidera hosi Komandante Seitór Operasaun hala’o inspesaun ba iha Munisípiu Bobonaro no konsege asegura sidadaun estranjeiru mane na’in-ualu ne’e hosi Indonézia ho naran inisiál EG tinan 20, AE tinan 20, HD tinan 51, DE tinan 34, TW tinan 34, ZB tinan 49, IAA tinan 23 no SA tinan 29.

“Sira na’in-ualu ne’e mak halo violasaun ba vistu tuir lei Migrasaun no Ázilu númeru 11/2017,” Hatutan.com sita esplikasaun Diretora Jerál Adjunta Servisu Migrasaun, Inspetora Xefe Polísia, Adelaide da Rosa, iha knaar fatin, Vila-Verde, Sesta (21/10/2022).

Ekipa asegura sidadaun estranjeiru ne’ebé kontra lei Migrasaun no Ázilu ne’e no fó notifikasaun hodi aplika kedan sansaun selu multa bainhira identifika tán aktu krime seluk maka sei submete ba iha Ministériu Públiku atu prosesa kriminál nian.

Servisu Migrasaun rekolla ona sira nia pasaporte no halo hela prosesu investigasaun iha sede sentrál Servisu Migrasaun nian no halo mós identifikasaun hodi aplika prosesu administrativa selu multa tanba lei la fó dalan ba vistu turista atu halo kualkér atividade profesionál iha territóriu nasionál.

Adelaide da Rosa apela ba komunidade hotu-hotu atu halo kooperasaun di’ak ho autoridade seguransa bainhira deskonfia sidadaun estranjeiru balun halo atividade komersiál uza vistu turista inklui prátika tráfiku umanu nian bele informa lalais ba parte Servisu Migrasaun.

Jornalista: Rogério Pereira Cárceres