Kambódia Admira no Apoia Totalmente Adezaun TL ba ASEAN

Hatutan.com, (22 Outubru 2022), Díli—Prezidente Republika (PR), hala’o enkontru kortejia ho entidade importante sira Kambódia nian hanesan Prezidente Senadu, Say Chhun, Prezidente Asembleia Nasionál, Heng Samrin no Primeiru-Ministru, Hun Sen, hodi ko’alia kona-bá reforsu relasaun bilaterál entre Timor-Leste (TL) ho Kambódia.

Prezidente Republika (PR), José Ramos-Horta hala’o enkontru kortejia ho entidade importante sira Kambódia nian hanesan Prezidente Senadu, Say Chhun, Prezidente Asembleia Nasionál, Heng Samrin no Primeiru-Ministru, Hun Sen, hodi ko’alia kona-bá reforsu relasaun bilaterál entre Timor-Leste (TL) ho Kambódia, Kinta (20/10/2022). Foto/Média PR.

Enkontru ho alta entidade hosi Reinu Kambódia, reprezenta Kambódia nia prontidaun hodi apoia Timor-Leste nia adezaun bá Association of Southeast Asian Nations (ASEAN).

Lee Mós: Ramos-Horta ho Alta Entidade Reinu Kambódia Análiza Situasaun Rejionál-Mundiál

“Primeiru-Ministru, Hun Sen admira teb-tebes Timor-Leste. Nia apoia makas, tanba sira-nia istória ne’e hanesan ita nian. Tanba ne’e, nia apoia makas Timor-Leste nia adezaun bá ASEAN. Laiha assuntu seluk, assuntu ne’ebé ko’alia ho Prezidente Assembleia Nasionál, Senadu, assuntu ne’ebé ko’alia ho Primeiru-Ministru, ko’alia ho entidade ministeriál sira seluk,” Hatutan.com sita deklarasaun Xefe Estadu Ramos-Horta iha komunikadu.

Ramos-Horta hateten, prosesu adezaun bá ASEAN seidauk kompletu, tanba líder hosi nasaun sira iha ASEAN nian, seidauk anúnsia kalendáriu, maske Timor-Leste hakarak adere ba organizasaun ne’e iha tinan oin.

“Maibe sei tuir road map ne’ebé lideransa ASEAN hetan konsensu, karik mak deside no sei anúnsia, Ita prepara tiha ona tinan 10 mai ne’e, seidauk prepara kompletu, konforme planu governu nian atu rekruta Timoroan 2.000. Mais Timoroan ne’ebé ho estudus ho kualifikasaun lingua ingleza, formasaun universitária di’ak atu servisu iha setór hotu-hotu hodi bele aprova duni, dinamiza ita-nia partisipasaun iha ASEAN,”  Xefe Estadu esplika.

Xefe Estadu ne’e konsidera partisipasaun Timor-Leste nian iha ASEAN importante tebes, tanba hola parte iha desizaun, opsaun estratéjiku, hodi dinamiza atividade ekonómika, komérsiu rejionál no seluk tán.

Hafoin enkontru ho Primeiru-Ministru, Hun Sen, Prezidente Repúblika, José Ramos-Horta mós sai sasin ba asinatura akordu entre Governu Timor-Leste ho Kambódia ne’ebé asina hosi Ministra Negósiu Estranjeiru no Kooperasaun, Adaljiza Magno, kona-bá servisu aéreo, hodi dezenvolve konetividade aérea entre Timor-Leste no Kambódia.

Ministra Negosiu Estranjeiru no Kooperasaun, Adaljiza Magno mós assina akordu ho Kambódia kona-bá exportasaun fós bá Timor-Leste.

Jornalista: Vito Salvadór