Komandu Operasaun Detein Diretór Ajénsia Viajen ida ho Inisiál SM

Hatutan.com, (22 Outubru 2022), Díli—Autoridade Seguransa no Defeza kompostu hosi Servisu Nasionál Intelijénsia (SNI), Servisu Informasaun Polísia (SIP), Servisu Informasaun Militár ho J2 FALINTIL-Forsa Defeza Timor Leste (F-FDTL) detein diretór ajénsia viajen ida iha Díli ho inisiál SM tanba iha relasaun ho kazu timoroan lubun ne’ebé  sai vítima no abandona iha Portugál, inklui timoroan balun ne’ebé la konsege bá Portugál maske hatama osan ho montante $3000 kada ema.

Lee Mós : Horta Fó Orden bá PCIC ho PNTL Buka Ajénsia Fasilita Timoroan “Abandona” iha Portugál

Diretór ajénsia viajen ida iha Díli ho inisiál SM. Foto/Espesiál

Detensaun bá diretór ajénsia viajen ida ho inisiál SM, Sesta (21/10/2022), bazeia bá mandadu hosi Tribunál Distritál Díli (TDD) ho Númeru Úniku Krime (NUC, sigla portugés) 215/22.PNSIK, hodi lori kedas bá sela detensaun durante oras 72 hodi hein submete bá primeiru interrogatóriu iha TDD.

Iha operasaun buska no detensaun ne’e, autoridade polisiál Timor nian  identifika katak    ajénsia viajen ne’e nu’udár mós ajénsia viajen ida hosi ajénsia viajen sira seluk ne’ebé eziste iha Timor no durante ne’e fasilita Timoroan liu  na’in-3000 bá servisu iha Portugál no nasaun sira Eropa nian, maibé realidade timoroan sira ne’e maioria abandonu hela iha Portugál hodi toba de’it iha jardín sira iha sidade Lizboa no fatin seluk tan iha Portugál.

Ekipa operasaun konjunta mós foti informasaun no identifika timoroan, mesak joven de’it, hamutuk na’in-14 ne’ebé mak konsidera hanesan vítima bá ajénsia viajen ne’e tanba sira hotu hatama tiha ona osan hamutuk $40,000-resin, maibé sira-nia viajen to’o de’it iha Bali-Indonézia no la konsege halo viajen liubá Portugal.

Foin lalais ne’e, Governu  mós halo ona apalu ida bá ajénsia viajen nasionál sira hodi labele bosok sidadaun sira ho promesa falsa sira kona-bá serbisu iha rai-li’ur.

Governu Konstitusionál VIII apela bá ajénsia viajen nasionál sira hodi labele bosok sidadaun sira ho promesa falsa sira kona-baáserbisu iha rai-li’ur no hodi informa bá sira-nia kliente sira, ne’ebé hakarak bá serbisu iha rai-li’ur, presiza iha ona kontratu serbisu nian molok halo viajen, atu evita bele hamosu fraude.

Governu informa mós katak sei adota medida sira ne’ebé presiza no adekuada atu prevene no hapara empreza sira ne’ebé ho intensaun ilísita, fó informasaun falsa bá sidadaun sira, ne’ebé bele konsidera hanesan atus tráfiku umanu nian.

Molok ne’e, Prezidente Repúblika (PR), José Ramos-Horta, hala’o enkontru ho autoridade polisia no militár sira, liuhosi enkontru Konsellu Defeza hodi fó orientasaun atu indeifika no kaptura ajénsia viajen sira ne’ebé  lohi timoroan sira ne’ebé daudaun ne’e moris susar tebetebes iha Portugal hodi toba de’it iha jardín sira iha sidade Portugal.

Jornalista : Rogério Cárceres