Vietname Sei Apoia Adezaun TL bá ASEAN

Hatutan.com, (24 Outubru 2022), Díli— Estadu Vietname komprometidu sei fó apoiu ba Timor Leste (TL) atu adere ba Association of Southeast Asian Nations (ASEAN).

Sekretariu jerál Ministériu Negósiu Estranjeiru no Kooperasaun (MNEK), Francisco Tilman Cepeda akompaña Embaixadór Vietname ba Indonézia Ta Van Thong entrega karta kredensiál ba Prezidente Repúblika José Ramos-Horta, iha Palásiu Prezidensiál Bairru-Pité, Segunda (24/10/2022). Foto/Média PR.

“Ohin iha Embaixadór naun rezidente na’in-tolu  ne’ebé mai aprezenta sira nia karat kredensiál ba Prezidente Repúblika mak hanesan, nasaun Vietname, Noruega no Áustria. Embaixadór Vietname ba Indonézia Ta Van Thong hateten, Vietname iha pozisaun ida klaru atu apoiu adezaun Timor Leste ba ASEAN,”  Sekretariu jerál Ministériu Negósiu Estranjeiru no Kooperasaun (MNEK), Francisco Tilman Cepeda hateten iha Palásiu Prezidensiál Bairru-Pité, Segunda (24/10/2022).

Lee Mós: Kambódia Admira no Apoia Totalmente Adezaun TL ba ASEAN

Francisco Tilman Cepeda  informa katak, Embaixadór Vietname Ta Van Thong promete bá Prezidente Repúblika katak bainhira Timor Leste tama ona ASEAN, Vietname sei mai loke embaixada permanente iha Timor Leste.

Vietname ko’alia barak liu kona-bá kooperasaun ne’ebé Timor Leste ho Vietname iha, ko’alia mós kona-bá apoiu Vietname nian ba Timor Leste atu sai hanesan país membru bá iha organizasaun rejionál ASEAN.

Austria no Noruegia mós iha komitmentu atu kontinua halo esforsu hodi harii sira nia embaixada iha Timor Leste no prontu atu iha kooperasaun di’ak ho Timor Leste iha Futuru.

Austria hanesan kuadru no membru Uniaun Europeia tanba ne’e Timor Leste halo kooperasaun barak ho Uniaun Europea, tanba ne’e Austria rasik mós fó apoiu barak ba Timor Leste.

“Austria iha mós kompromisiu atu apoia Timor Leste tanba TL rasik iha relasaun istóriku desde tempu antes indepedénsia to’o ohin loron,” subliña.

Durante reuniaun Prezidente Repúblika agradese ba país ne’ebé de’it mak iha interese atu mai loke sira nia embaixada iha Timor Leste.

Embaixadór tolu hosi nasaun tolu ne’ebé entrega kredensiál bá Prezidente Repúblika José Ramos-Horta mak hanesan Embaixadór Ta Va Thong husi Vietname, embaixadora Ruth Kruger Giverin Noruega no Embaixadór Thomas Loidl Austria.

Jornalista: VitoSalvadór