Kazu Sela Caicoli, PNTL Seidauk Konklui Investigasaun ba Membru Na’in-sia

Hatutan.com, (26 Outubru 2022), Díli—To’o oras-ne’e Komandu Polísia Nasionál Timor-Leste (PNTL), seidauk konklui investigasaun no prosesu dixiplinár bá nia membru na’in-sia ne’ebé deskonfia involve iha kazu tara-an iha Sela Detensaun Caicoli, Munisípiu Díli.

Inspetór Jerál iha Komandu Jerál PNTL, Superintendente Xefe Polísia, Carlos Jerónimo.

Kazu insidente ne’e akontese iha Kinta, (01/09/2022) rezulta vítima José Bernardo lakon vida ho kondisaun tali iha hela kakorok, iha ne’ebé deskonfia katak vítima rasik mak tara-an.

Lee Mós: Komandu PNTL Forma Ona Ekipa Hodi Investiga Kazu Mate Iha Sela Polísia Caicoli

Parte Komandu PNTL hola kedan medida hodi halo demisaun preventiva bá membru na’in-sia ne’ebé mak iha altura ne’ebá, halo pikete no kontrola vítima iha Sela Detensaun Komandu Caicoli.

“La’ós prosesu ne’e bá Ministériu Públiku, maibé prosesu disiplinár sei hala’o hela. Ne’e sei loke hela prosesu no seidauk aprezenta hodi foti desizaun,” Inspetór Jerál iha Komandu Jerál PNTL, Superintendente Xefe Polísia, Carlos Jerónimo hateten iha Kuartél Jerál PNTL, Caicoli, Kuarta (26/10/2022).

To’o agora Komandante Carlos Jerónimo seidauk bele fó sai kona-bá membru na’in-sia ne’e, posibilidade sai hosi instituisaun PNTL ka la’e, tanba komandu nunka bele mehi buat ida-ne’e.

“Ita presiza mak faktus sira ne’e hotu ho nia apuramentu ne’e ami sei haree, análiza didi’ak, prosesu oinsá. Prosesu krime nian karik aprezenta bá Ministériu Públiku no ida ne’e prosesu ida. Prosesu disiplinár la’o nafatin,” Superintendente Xefe Polisia Carlos Jerónimo, hateten.

Kona-bá suspensaun preventiva ne’e vaálidu durante loron 60, bainhira prosesu ne’e seidauk remata, bele estende tán ho nia tempu hanesan bá loron 60 tán.

Nia mós rekoñese katak, relatóriu ne’ebé mak antes ne’e PDHJ halo kona-bá kazu ne’e, la sees mós hosi saida mak parte Komandu PNTL halo.

Jornalista: Rogério Pereira Cárceres