Xina Oferese Ekipamentu Seguransa ba PNTL

Hatutan.com, (28 Outubru 2022), Díli—Governu Xina liuhosi nia embaixada iha Timor-Leste (TL), iha Kinta 28 Outubru 2022 entrega tán ona ekipamentu sira kona-bá seguransa nian hanesan, xápeo militár ka boiña hamutuk 2.000, biti kombate funu 100, stick 1.000 inklui solar painel 100 bá komandu Polísia Nasionál Timor-Leste (PNTL), hodi haforsa dezenvolvimentu infra-estrutura iha instituisaun ne’e.

Embaixadór Xina iha TL, Xioa Jonguo entrega ekipamentu sira kona-bá seguransa nian bá Komisáriu PNTL Faustino da Costa, hodi haforsa dezenvolvimentu infra-estrutura iha instituisaun ne’e, iha sala auditóriu Kuartél Jerál Komandu PTNL, Caicoli, Díli, Kinta (28/10/2022).

Ekipamentu sira ne’e entrega direta hosi Embaixadór Xina iha TL, Xioa Jonguo no simu direta hosi Komisáriu PNTL Faustino da Costa akompaña hosi Komisáriu Mateus Fernandes, iha sala auditóriu Kuartél Jerál Komandu PTNL, Caicoli, Díli.

 Lee Mós: Xina Apoiu $70,000 Hasa’e Produsaun Kafé Timor

Embaixadór Xiao Jianguo hateten, ekipamentu seguransa hirak ne’e sosa ho osan $80.000 ekivale ho osan Xina nian 500.000 RMB yuan.

“Neste momentu, ekipamentu sira-ne’e utiliza hosi Polisia Xina nian iha ami nia nasaun. Ha’u fiar katak, ho ekipamentu sira ne’ebé ami fó bele tulun PNTL nia membru sira hodi bele uza bá iha área operasionál ninian,” Embaixadór Xina iha TL, Xiao Jianguo hateten iha serimónia entrega ekipamentu sira ne’e, iha Sala Auditóriu Kuartél Jerál PNTL, Caicoli, Kinta (28/10/2022).

Governu Xina konsidera importante tebes atu estabelese kooperasaun di’ak entre polísia ho polísia nasaun rua.

Xina prontu atu halo buat ne’ebé di’ak bá hasa’e kapasidade dezenvolvimentu membru PNTL nian no kontribui mós bá segurasa no estabilidade TL nian.

Komandante jerál PNTL, Komisáriu Polísia Faustino da Costa hateten, PNTL hetan oportunidade hodi simu sasán doasaun hosi embaixada Xina, bá instituisaun PNTL.

“Sasan hirak ne’e, importante tebes hodi bele apoia ka suporta ita iha momentu no oportunidade hala’o ita nia kna’ar iha baze, liu-liu bá membrus sira iha área operasionál ninian,” Komisáriu Faustino da Costa hateten.

Ekipamenetu bázika sira hanesan, Solár Paibel ne’ebé hetan doasaun hosi embaixada Xina ne’e, sei koloka bá halo instalasaun iha Postu Seguransa sira iha área fronteira, liu-liu postu sira ne’ebé seidauk iha instalasaun ka asesu bá naroman eletrisidade.

Maske nune’e, Solár Painel hirak ne’e mós sei distribui bá iha munisipiu, liu-liu iha komandu munisipiu no eskuadra sira, ne’ebé dala-wain iha tempu balun, komandu hasoru problema kona-bá eletrisidade.

“Husu ita boot sira, sasán sira ne’ebé sei distribui, atu utiluza ho di’ak, tuir nesesidade servisu nian, presiza kuida sasán sira ne’e, nune’e ita bele uza bá tempu naruk,” Faustino husu.

Iha 2019, Governu Xina, liuhosi nia embaixada Xina iha Dili TL apoia ona PNTL ho item rua mak hanesan uniforma servisu, diáriu sira operasionál Polisia nian ho nia kuantidade 4.500 páres. Alende ne’e, apoiu mós karpapura ne’ebé kompletu bá membru PNTL ho kuantidade sasán maka 4.500.

Durante ne’e, parseiru sira ne’ebé sempre ho apoiu bá PNTL mak hanesan Timor-Leste Police Developmetn Programe (TLPDP) ne’ebé mak mai hosi Polisia Federal Australia, United Nations Development Programe (UNDP), Organizasaun Internasionál bá Migrasaun (IOM-Sigla Inglés), Embaixada Estadu Unidu Amérika nian (EUA) iha TL, nomós seluk tán.

Tuir planu, iha 2023 Governu Xina liuhosi nia embaixada iha TL sei apoia tán ekipamentu balun hanesan motorizada bá PNTL nia Departamentu Tránzitu no Seguransa Rodoviáriu. Apoiu ida ne’e, hodi hatán bá pedidu ne’ebé sumbete hosi Komandu jerál PNTL.

Jornalista: Rogério Pereira Cárceres