Kazu Dare, MP Promove Arguidu 27 ho Krime Omesídiu Simples no Krime Arma Branka

Hatutan.com, (06 Novembru 2022), Díli—Tribunál Distritál Dili (TDD), iha domingu 06 novembru 2022, hala’o prosesu Primeiru Interrogatóriu Judisiál bá arguidu sira na’in-27 tanba deskonfia involve iha kazu asaltu iha aldeia Fatunaba, Suku Dare, Postu Administrativu Na’in-Feto, Munisípiu Díli durante finadu.

Tribunál Distritál Dili (TDD), iha domingu 06 novembru 2022, hala’o prosesu Primeiru Interrogatóriu Judisiál bá arguidu sira na’in-27 tanba deskonfia involve iha kazu asaltu iha aldeia Fatunaba, Suku Dare, Postu Administrativu Na’in-Feto, Munisípiu Díli durante finadu. Foto/Elio dos Santos da Costa.

Observasaun Hatutan.com iha terrenu, membru Polísia Nasionál Timor-Leste (PNTL) unidade Servisu Investigasaun Kriminál (SIK), transporta arguidu sira bá iha TDD iha tuku 11:00 dadeer, ho kondisaun alzema (borgol) iha liman.

Lee Mós: Konfrontu Dare, Autór 27 Submete bá Primeiru Interrogatóriu Iha 05 Novembru

Hafoin to’o iha TDD, arguidu sira deskansa iha sela Tribunál Díli kuaze oras balun, molok tama bá sala julgamentu hodi submete bá Primeiru Interrogatóriu.

Família hosi arguidu sira ne’ebé hakarak bá akompaña durante prosesu interrogatóriu, parte seguransa sivil ho PNTL la autoriza no taka metin portaun TDD.

Iha prosesu Primeiru Interogatóriu ne’e, Ministériu Públiku  (MP) ne’ebé reprezenta hosi Prokuradór Domingos Barreto, iha sala julgamentu promove arguidu sira ho Krime Omesídiu Simplés ne’ebé previstu artigu 138, hosi Lei Kódigu Prosesu Penál Timor-Leste nian no Krime Arma Branka hosi lei númeru 5/2017.

Primeiru interrogatóriu ne’e, hahú hosi tuku 12:00 oras meiudia, Juiz Afonso Carmona, deside hodi bolu arguidu sira tama ida-idak bá sala julgamentu hodi konfesa sira-nia aktu ne’ebé halo durante konfrontu iha Dare.

Interrogatóriu bá kada arguidu, to’o iha tuku 18:00 lokraik parte TDD foin konklui ema na’in-neen, no hela arguidu na’in-21.

Nune’e, TDD deside muda loron julgamentu ne’e kontinua bá segunda (07/11/2022), tuku 10:00 dadeer Otl, hodi kontinua rona deklarasaun hosi arguidu sira.

Audiénsia iha prosesu Primeiru Interogatóriu ne’e prezide hosi Juiz singular, Afonso Carmona, Ministeriu Públiku reprezenta hosi Prokuradór Domingos Barreto, no arguidu sira hetan asisténsia legál hosi Advogadu na’in-haat.

Jornalista: Rogério Pereira Cárceres