Grupu Deskoñesidu Tuda-Rahun Uma Iha Balibar no Hakanek Feto Ida

Hatutan.com, (08 Novembru 2022), Díli— Polísia Nasionál Timor-Leste (PNTL), buka tuir autór ne’ebé involve iha kazu asaltu hodi hakanek vitima Agostinha José Pereira Neves, tinan 28 no tuda-rahun uma iha area foho lolon Balibar aldea Raikuak, Suku Lahane Osidentál, Postu Administrativu Vera-Cruz, Munisípiu Díli.

Grupu Deskoñesidu Tuda-Rahun Uma Iha Balibar no Hakanek Feto Ida aldea Raikuak, Suku Lahane Osidentál, Postu Administrativu Vera-Cruz, Munisípiu Díli, Segunda (07/11/2022). Foto/PNTL.

Tuir deklarasaun hosi vítima hanesan uma na’in, Wilson José Pereira Neves katak, asaun ne’ebé konsidera tentativa omesídiu ne’e akontese iha Segunda (07/11/2022) tuku 01h30 madrugada bainhira vítima hamutuk ho família sei deskansa hela.

Lee Mós: Konfrontu iha Dare Durante Finadu, Ida Mate Fatin

“Ami hamutuk ho familia toba hotu derrepente ema tuda fatuk ba uma leten no hakilar dehan, ne’e sete-sete imi halimar imi mate tán,” Hatutan.com sita deklarasaun uam nain iha komunikadu.

Rona ida ne’e uma na’in  sente tauk hodi nonok de’it iha uma laran no Wilson  rasik telefone kedan ba Polisia husu ajuda, maibé lakleur de’it iha oras tuku rua resin sira komesa mai besik falun oin ho sira nia faru uza sasan kro’at baku mate ahi oan iha ferik katuas nia rate oin no kontinua uza besi meik baku rahun vidru janela tolu hodi kona Agostina nia oin no sira sona diman iha odamatan vidru rahun hotu sorte polisia mai lalais.

Bainhira grupu deskoñesidu ne’e halo asalta sira haree PNTL komesa sai hosi foho lolon mai no sira konsege halai sa’e liu ba foho leten.

Hafoin akontesimentu ekipa konjunta Servisu Informasaun Polísia Nasionál (SIPN-PNTL), hamutuk ho Servisu Informasaun Militár (SIM-F-FDTL), junta ho J2, Unidade Informasaun Falintil, S2, toó kedas fatin akontesimentu hodi hakalma situasaun no transporta kedan vítima ba ambulansia hodi hala’o tratamentu.

Vitima Agostinha Jose Pereira Neves deklara, nia hetan sona iha parte hasan karuk no durante ne’e nia laiha inimigu ho ema se de’it tanba hanoin de’it mak nia servisu.

Grupu Deskoñesidu Tuda-Rahun Uma Iha Balibar no Hakanek Feto Ida aldea Raikuak, Suku Lahane Osidentál, Postu Administrativu Vera-Cruz, Munisípiu Díli, Segunda (07/11/2022). Foto/PNTL.

“Ha’u servisu cleaner iha otel Bidau. Ema sira ne’e ami ladun koñese maibé ha’u haree mane isin badak ida hakilar sona tama besi meik mai ha’u nia oin ne’e nia lian ha’u deskunfia ami nia viziñua maibé ha’u lakohi dun ema,” Agostinha hateten.

Agostinha kondena hahalok krime ne’ebé akontese no husu PNTL buka tuir suspeitu hirak ne’ebé involve iha kazu refere nune’e sira labele moris iha trauma nia laran.

Parte SIPN mós kontaktu kedan ba Eskuadra PNTL Na’in-Feto hodi rekolla informasaun no buka tuir autór sira ne’ebé involve iha asaun brutál ne’e.

Ho situasaun ne’e, PNTL involve BOP, COE no Eskuadra Na’in-Feto asegura hela vítima nia uma hodi garante hakmatek no halakon trauma ba kiik oan sira.

Jornalista: Rogério Pereira Cárceres