Saúde
Osan La iha, Pesoál Saúde 3,000 Sei Lakon Servisu
Hatutan.com, (08 Novembru 2022), Díli-Pesoál saúde sira liu ema 3,000 ne’ebé durante períodu pandemia Covid-19, Governu liuhosi Ministériu Saúde rekruta no kontrata, sei lakon hikas sira-nia servisu iha fulan-Dezembru 2022 tanba Ministériu Saúde laiha ona osan atu selu sira-nia saláriu ho remunerasaun sira kada fulan.
Lee Mós : Komunidade Fatumakerek Presiza Pesoál Saúde Sira-Nia Prezensa
Edifisiu Ministériu Saúde iha Caicoli, Díli. Foto/Elio dos Santos da Costa
Ministériu Saúde hasai ona karta deliberasaun no notifikasaun bá pesoál saúde sira ne’e hotu, inklui distribui ona bá sentru saúde ho postu saúde iha territóriu nasionál kona-bá lista naran pesoál saúde sira ne’ebé tenke husik ona sira-nia servisu hahú iha loron 31 fulan-Dezembru 2022.
“Ne’e tanba orsamentu ne’e. Orsamentu kuandu laiha ne’e, ita labele emprega ema ruma. Kuandu laiha orsamentu atu fó bá sira-nia saláriu ne’e. Entaun, ita haree bá ida ne’e maka, ita tenke hapara balu, ne’ebé mak fiksa ona iha fulan-Dezembru ne’e,” Vise Ministru Saúde (MS), Bonifácio Maucoli dos Reis, hateten hodi responde Hatutan.com iha Parlamentu Nasionál, Segunda (07/11/2022).
Bonifácio Maucoli klarifika tan, bá professional saúde sira, liu-liu Médiku no Enfermeiru sira la para, katak, governu sei kontinua kontratu. Maibé, MS ‘notifika’ tiha sira ne’ebé maka la’ós profisionál ne’e, tanba iha momentu asina kontratu servisu ema barak maka tama iha ne’ebá.
“Balu limpeza, balu mak mai hosi saida, entaun ita hapara, depois kontinua mantein nafatin sira ne’ebé mak hanesan médiku, enfermeiru, mais nesesáriu. Sira ne’ebé mak envolve iha atividade saúde bá família ne’e, sira ne’e sei nafatin konsidera,” Vise Ministru Saúde Bonifácio Maucoli, hateten.
Lee Mós : Preokupasaun Komunidade Fatumakerek, MS Sei Harii Tan Postu Saúde 100 iha Área Remota
“Antes ne’e, ami rekruta pesoál sira kuaze 3,000 ka besik 4,000. Ne’e bá ámbitu kombate no kontra COVID-19,” nia hateten.
Vise Ministru Saúde (MS), Bonifácio Maucoli dos Reis. Foto/Elio dos Santos da Costa
Iha fulan-Dezembru ne’e, MS sei hapara duni sira-nia kontratu servisu, tanba foin lalais parte ministériu notifika ona, no depois sei haree fila-fali, atu nune’e MS bele haree fali sira ne’ebé maka hanesan médiku, enfermeiru, parteira sira ne’e.
Tuir rekizitu bá kada postu saúde sira tenke iha médiku ida (1), enfermeiru rua (2), parteira rua (2), no mós tékniku aliadu. Maibé, to’o oras ne’e MS sei bele prienxe, tanba ne’e, ministériu sei rekruta. Maske nune’e, sira ne’e kontratadu, la’ós permanente. Bainhira atu bá funsionáriu permanente ne’e tenke hein vaga ne’ebé mak aloka hosi Komisaun Funsaun Públika.
Hatán kona-bá dadus, serteza na’in hira ka pesoál na’in-hira mak MS atu hapara sira ninia kontratu, Bonifácio Maucoli sei konfirma fila-fali ho tékniku depois mak sei informa fali bá públiku.
Dadus ne’ebé Hatutan.com asesu, rasik hosi fontes sira iha Ministériu Saúde, molok ne’e, totál pesoál saúde sira ne’ebé mak MS rekruta iha tempu pandemia COVID-19, hamutuk 2,258. Hosi pesoál sira-ne’e, ho tipu kontratu iha Programa Tabaco Sesation na’in-neen (6), Saúde bá Familia (774), Kontratu bá kombate COVID-19 tinan 2022 (1008) , Kontratu Regulár (396) ho Kontratu RSETL (74).
Hatutan.com mós tenta ona halo konfirmasaun ho Ministra Saúde, Odete Maria Freitas Belo, kona-bá termina kontratu servisu pesoál saúde lubun ne’e, maibé nia seidauk bele fó informasaun tanba presiza verifika didi’ak ho tékniku sira, liuliu Diresaun Nasionál Rekursu Umanu, Ministériu Saúde.
Jornalista: Rogério Pereira Cárceres