PNTL Asegura Família Tolu Iha Lahane Ne’ebé Trauma

Hatutan.com, (09 Novembru 2022), Díli—Ekipa konjunta, Polísia Nasionál Timor Leste (PNTL) asegura ona família tolu iha aldeia Ainitas-Hun, Suku Lahane Osidentál, ne’ebé trauma hafoin akontese tuda-malu iha área ne’e iha Domingu (06/11/22) tuku 16:00 loro-kraik ne’ebé afeta situasaun la ha hakmatek iha área ne’e.

Família tolu ne’e kompostu hosi feto faluk ho idade avansada no labarik sira ne’ebé hela besik área konflitu, no muda ona bá fatin seguru hodi hein rekoperasaun situasaun.

Lee Mós: Grupu Deskoñesidu Tuda-Rahun Uma Iha Balibar no Hakanek Feto Ida

Ekipa konjunta, Polísia Nasionál Timor Leste (PNTL) asegura ona família tolu iha aldeia Ainitas-Hun, Suku Lahane Osidentál, ne’ebé trauma hafoin akontese tuda-malu iha área ne’e iha Domingu (06/11/22) tuku 16:00 loro-kraik ne’ebé afeta situasaun la ha hakmatek iha área ne’e. Foto/PNTL.

Família hirak ne’e husu rasik ba autoridade seguransa atu muda sira provizóriu hosi fatin ne’e ba fatin seguru tanba trauma ho situasaun atuál joven sira kontinua sadik-malu iha tempu kalan.

“Ami-nia preokupasaun desde Domingu hafoin akontesimentu. Labarik sira hakfodak hela de’it no pániku. Kalan ami buka maluk sira ne’ebé besik hodi bá deskansa ka toba hodi bele asegura ami-nia an,” Hatutan.com sita deklarasaun Silvia la’ós naran loloos, hosi aldeia Ainitas-Huniha komunikadu.

Oras-ne’e daudaun família hirak ne’e hetan apoiu hosi uma na’in liu-liu fatin toba, han-hemu no nesesidade báziku seluk tán tanba maioria labarik.

Totál membru família hosi família tolu ne’e hamutuk ema na’in 25 ne’ebé maioria labarik kiik oan no balun iha hela kondisaun moras.

Família hirak ne’e rekomenda ba PNTL atu instala postu seguransa provizóriu ida iha área ne’e hodi fó hakmatek ba sira nia aldeia.

Oras ne’e daudaun, ekipa konjunta kompostu hosi Forsa Polisia lidera hosi SIPN ho Unidade Informasaun FALINTIL, kontinua hala’o vizilánsia iha fatin ne’e tanba konsidera risku ba konflitu.

Jornalista: Rogério Pereira Cárceres