Fevereiru 2023, Prezidente Repúblika Dekreta Kalendáriu Eleisaun Parlamentár

Hatutan.com, (10 Novembru 2022), Díli—Prezidente Repúblika (PR), José Ramos-Horta sei dekreta no anunsia kalendáriu eleisaun Parlamentár iha fulan Fevereiru tinan 2023.

Prezidente Repúblika José Ramos-Horta. Foto/Elio dos Santos da Costa

“Fulan Fevereiru ha’u tenke dekreta kalendáriu eleisaun Parlamentár. Mínimu tenke loron 80 antes dekreta ba data eleisaun. Ha’u la hatene loron saida, maibé fulan Fevereiru ha’u tuir de’it kalendáriu tinan 2018 nian,” Ramos-Horta hateten hafoin vizita Institutu Superiór Cristal, iha Balidé, Kinta (10/11/2022).

Lee Mós: Tribunál Rekursu Proklama Ramos-Horta Eleitu ba Prezidente Repúblika 2022-2027

Xefe Estadu ne’e afirma, bainhira manán iha eleisaun Prezidensiál liubá la dekreta eleisaun antesipada tanba lakohi ekonomia nasaun nian paralizadu no povu sofre, maibé hakarak situasaun kalma, povu hakmatek, konsentra ho sira nia moris no Prezidénsia Repúblika bele halo kooperasaun di’ak ho Governu atu tulun hadi’a situasaun balun ba povu nia moris di’ak hodi hein eleisaun Parlamentár.

TL maski ho populasaun milliaun ida resin de’it, maibé partidu barak loos, Ramos-Horta konsidera ida ne’e tanba hotu-hotu hakarak hetan kadeira rua, depois husu tau Ministru ida, asesór barak depois ba litik Líder nasionál Kay Rala Xanana Gusmão, Marí Alkatiri, tenke fó pasta ba sira.

“Maski kadeira rua ka lima de’it, balun hakarak Vise Primeiru Ministru kedan, hakarak Ministru Interiór lori asesór lubuk ida tuur iha varanda bilan hela,” nia hateten.

Molok ne’e, Xefe Estadu hala’o ona enkontru ho Órgaun Eleitorál Komisaun Nasionál Eleisaun (CNE) hodi ko’alia kona-bá Eleisaun Prezidensiál 2022-2027 ne’ebé liu ona no preparativus bá Eleisaun Parlamentár 2023.

Jornalista: Vito Salvadór