PNTL Asegura Ema Sivíl Ida Ameasa Membru F-FDTL

Hatutan.com, (10 Novembru 2022), Díli—Ekipa konjunta hosi Palísia Nasionál Timor Leste (PNTL) asegura joven mane ida ho inisiál JMR tinan 46, hosi aldeia Bekusi Kraik, Suku, Becora ne’ebé komete kazu ameasa hodi baku membru F-FDTL feto ida iha área Faról, aldeia Lirio, Suku Motael, Postu Administrativu Vera -Cruz, Munisípiu Díl, Kinta (10/11/2022) madrugada tuku 1h30.

Ekipa konjunta hosi Palísia Nasionál Timor Leste (PNTL) asegura joven mane ida ho inisiál JMR tinan 46, hosi aldeia Bekusi Kraik, Suku, Becora ne’ebé komete kazu ameasa hodi baku membru F-FDTL feto ida iha área Faról, aldeia Lirio, Suku Motael, Postu Administrativu Vera -Cruz, Munisípiu Díl, Kinta (10/11/2022) madrugada tuku 1h30. Foto/PNTL.

“Ekipa konjunta ne’e lidera hosi Servisu Informasaun Polísia Nasionál (SIPN-PNTL), Servisu Informasaun Militár (SIM-F-FDTL), junta ho J2 hamutuk ho Unidade Informasaun FALINTIL, to’o kedan fatin akontesimentu hodi hakalma situasaun no asegura kedan suspeitu JMR ne’ebé nu’udár funsionáriu públiku,” Hatutan.com sita komunikadu.

Lee Mós: Membru F-FDTL Na’in-40 Kontribui Ran ba HNGV

Vítima ho naran Lucia A. de Jesus tinan 41, nu’udár Primeiru Sarjentu iha Unidade Apoiu Servisu (UAS), F-FDTL no hela iha aldeia Moris Foun, Suku Comoro, Postu Administrativu Dom Aleixo, Munisípiu Díli.

Ekipa konjunta rekolla informasaun hosi sasin sira ne’ebé hela besik no rekolla mós evidénsia balun iha suspeitu JMR nia karreta laran mak hanesan Gas Lakrimozeniu, Stick no Rádio ida, nune’e ekipa kontatu kedan ba Polísia Militár (PM) mai hodi foti suspeitu ba kontinua halo prosesu identifikasaun iha Kuartél Polísia Militár Kintal Boot.

Hafoin akontesimentu ekipa konjunta Forsa Polísia kontinua hala’o vizilánsia rutina iha área sira ne’ebé konsidera risku ba konflitu makas hanesan Bairru-Pité, Bidau Akadiruhun, Tahu Laran, Merkadu Taibesi, Xina Rate, Lahane, Balibar, Dare, Laulara, Matadouru no Caicoli.

Jornalista: Rogério Pereira Cárceres