Hatutan.com, (11 Novembru 2022), Phnom Penh— Konferénsia Altu Nivel (KTT, sigla Indonézia) bá dala-40 ho 41 nasaun sira membru ASEAN nian ne’ebé hala’o iha Phnom Penh, Cambodia, Sesta (11/11/2022), diskute isu relevante sira violénsia no impase polítika iha Myanmar no liuhosi enkontru ne’e mós lider nasaun sira membru ASEAN nian ein-prinsípiu konkorda simu adezaun Timor-Leste nian bá ASEAN hanesan membru bá dala-11 ho estatutu hanesan observadór.
Lee Mós : ASEAN Nu’udár Parseiru Boot Hodi Promove Pás no Estabilidade ba Mundu
Enkontru Altu Nivel nasaun sira membru ASEAN iha Cambodia. Foto/Sekretariadu PRI
Konkordánsia simu adezaun Timor-Leste nian nu’udar membru ASEAN bá dala-11 ida-ne’e konsagra ona iha deklarasaun ASEAN nian ne’ebé sita hosi ajénsia notisioza Reuters.
Tuir deklarasaun ofisiál ne’ebé lansa, katak ASEAN simu adezaun Timor-Leste nian hanesan membru ho estatutu observadór bá enkontru sira ASEAN nian inklui plenária konferénsia altu nivel (KTT, sigla Indonézia).
Konferénsia altu nivel membru nasaun sira ASEAN nian iha Cambodia ne’e sai mós hanesan inísiu enkontru boot rua iha Sudeste Aziátiku; G20 ho APEC. Nune’e, reuniaun ne’ebé hola parte hosi Prezidente Repúblika ka nai-ulun nasaun membru ASEAN nian ne’e diskute maka’as liu kona-ba impase polítika iha Myanmar inklui isu global sira seluk tan.
Sorumutuk nasaun sira membru ASEAN nian ne’e mós sei diskute mós kona-bá disputa iha tasi Norte Xina (LCS, sigla Indonézia), isu pandemia, komérsiu ho mudansa klimátika.
ASEAN ne’ebé estabelese hosi nasaun lima; Indonézia, Malázia, Singapura, Tailándia ho Filipina iha loron 08 fulan-Agostu 1967 liuhosi deklarasaun Bangkok-Tailándia.
Oras ne’e nasaun sira membru ASEAN hamutuk 10, mak hanesan Indonézia, Malázia, Singapura, Tailándia, Filipina, Brunei Darussalam, Vietnam, Laos, Myanmar ho Cambodia.
Fontes : Reuters/KOMPAS.COM