PN Aprova Orsamentu MOP Millaun $181

Hatutan.com, (15 Novembru 2022), Díli—Parlamentu Nasionál (PN) aprova ona Orsamentu ba Ministériu Obras Públika (MOP) ba tinan 2023 ho montante $181.311.256.

Estrada át iha área Otél J.L Vila, Díli kauza husi kalamidade 04 Abríl 2021. Foto/Hatutan.com.

Aprovasaun ne’e, iha Tersa dader ne’e bainhira Ministru Obras Públikas (MOP), Abel Pires da Silva,  akompaña Primeiru Ministru (PM), Taur Matan Ruak, hodi aprezenta no defende iha debate espesliadade ba proposta Orsamentu Jerál Estadu (OJE) tinan fiskál 2023 nian, iha uma fukun Parlamentu Nasionál.

Iha diskusaun no debate ne’e proposta OJE bá MOP tinan fiskál 2023 deputadu sira aprova ho votus afavór 42, kontra 2 no abstensaun 17.

Proposta OJE MOP ba tinan fiskál 2023 ho totál orsamentu hamutuk $181.311.256, sei kobre programa MOP nian maka hanesan;

– Programa 026, estrada no ponte hamutuk orsamentu millaun $40,471.358.

– Programa 028, Dezemvolmentu rurál no urbanu nia orsamentu hamutuk millaun $3.611.246.

– Programa 510, Boa governasaun, jestaun institusionál nia orsamentu hamutuk millaun $16.188.152.

– Programa 798, Bee no saneamentu orsamentu hamutuk millaun $21.

– Programa 802, Eletrisidade nia orsamentu hamutuk millaun $100.

– Programa 980, igualidade jéneru no inkluzaun sosiál nia orsamentu hamutuk rihun $40.

Tuir ajenda diskusaun espesialidade ba OJE tinan fiskál 2023 ne’e sei remata iha loron 18 fulan-Novembru tinan 2022, hafoin aprova iha finál globál no sei haruka ba Prezidente Repúblika, José Ramos Horta, atu hetan promulgasaun.

Jornalista: Rogério Pereira Cárceres