Nasionál
Governu Tenke Trata Seitór Privadu Independentemente no La’ós Haree bá Partidu
Hatutan.com, (17 Novembru 2022), Díli—Prezidente Repúblika (PR), José Ramos-Horta husu governu tenke halo tratamentu bá seitór privadu nasionál hotu-hotu hanesan no labele politiza, tanba ne’e implika ba kresimentu seitór ekonómiku.
Prezidente Repúblika (PR), José Ramos-Horta konversa ho Emprezáriu Timoroan Raul Lemos iha otél Novo Turismu, Lecidere, iha ámbitu kongressu Câmara de Comércio e Industria Timor Leste (CCI-TL) ba dala-IV, Kinta (17/11/2022). Foto/Média PR.
Xefe Estadu hateten asuntu ne’e iha diskursu kongressu Câmara de Comércio e Industria Timor Leste (CCI-TL) ba dala-IV, iha otél Novo Turismu, Lecidere, Kinta (17/11/2022).
Lee Mós: Kongresu CCI-TL, Oscar Lima Husu Governu Nia Seriedade Promove Setór Privadu Nasionál
“Husu atu governu apoia seitór privadu nasionál la’ós tanba partidu polítiku, maibé independentemente apoiu seitór privadu tanba sira nia direitu duni. Presiza diálogu ida di’ak entre governu ho seitór privadu hotu, la’ós apoiu tanba partidu politiku hanesan, la’ós emprezáriu ida-ne’e, ida ne’ebá kamarada ka kompañeiru ka kompatriota, maibé apoiu ho kakutak malirin atu dezenvolvimentu iha rai ne’e la’o ba oin ho susesu,” Ramos-Horta husu.
Xefe Estadu konsidera seitór privadu nasionál hanesan ajente Estadu bá ekonomia Timor nian, nune’e tenke iha tratamentu independentemente hodi la’o ba oin ho kreatividae, ho korázen no ho audácia.
“Governu mak tenke hatudu matenek, kuandu iha podér, mobiliza hotu-hotu atu halo entrepreneur boot ida ba seitór privadu hotu-hotu,” Ramos-Horta fó hanoin.
Jornalista: Vito Salvadór