Hatutan.com, (21 Novembru 2022), Atauro—Festivál Múzika no Kulturál ne’ebé Estadu realiza iha Munisípiu Ataúro lori ksolok ba komunidade iha illa ne’e tanba oferese mós benefísiu direta liuliu promove no esplora pontensialidade iha área oioin liga ho kultura no múzika.
Komunidade no vizitante sira hahú harame festivál múzika no Kultura Ataúor ho tebe, bidu no dahur inklui ho feira produtu lokál no artezenatu. Foto/Vito Salvadór.
Koordenadór grupu tradisionál Zona Mesak Ataúru, Afonso Henrique Ximenes hateten, hanesan Ataúro oan sente orgullu ho festivál múzika no kultura ne’ebé foin ba dala uluk realiza iha Ataúru.
Nune’e mós komunidade Dan Gomes hosi aldeia Adara, Suku Beloi sente kontente, tanba Presidénsia Repúblika no Governu realiza festival no fó oportunidade ba komunidade atu hatudu produtu ne’ebé iha.
“Iha eventu ida ne’e ita bele promove mós produtu lokál hanesan produtu hosi kreatividade, homan, ukir ida ne’e mós bele promove daudaun hodi hasa’e ba merkadu,” Dan Gomes hateten.
Komunidade Domingas Ximenes hosi aldeida Watulela, Suku Vila Maumeta agradese ba Estadu Timor Leste ne’ebé hakarak promove Ataúro ba mundu.
Iha ámbitu festivál múzika no kulturál ne’e, komunidade mós fa’an sasán tradisionál hanesan bote ho presu $4, balun fa’an ho presu $2 to’o $5, luhu $1 , lafatik $2 no seluk tán.
Observasaun Hatutan.com iha fatin realizasaun festivál múzika no kultura iha suku Villa-Maumeta nota katak komunidade no vizitante sira hahú harame festivál ne’e ho tebe, bidu no dahur inklui ho feira produtu lokál no artezenatu.
Promove Potensialidade Turístika TL
Prezidente Repúblika, José Ramos-Horta ho Primeiru Ministru, Taur Matan Ruak iha Ataúro, Segunda (21/11/2022). Foto/Vito Salvadór.
Tuir karta komunidadu ne’ebé ohin fó sai hosi Presidénsia Repúblika (PR), Xefe Estadu José Ramos-Horta afirma Estadu no Governu hamutuk ho autoridade no komunidade Ataúro inklui parseiru sira, realiza Festivál Kulturál no Múzika iha Munisípiu ne’e hodi promove potensialidade turístika ne’ebé sei lori benefísiu ba Timor Leste.
Programa festivál múzika no kultura Ataúro ne’e sei realiza durante loron haat (11-24 fulan novembru). Festival ne’e atu tulun prezervasaun kulturál, esplora no transmite ba jerasaun foun, eransa kulturál no transforma valór hirak ne’e ho atrasaun turístika, ne’ebé bele apoia dinamizasaun atividade ekonómika iha Munisípiu Ataúro.
“Ataúro istória mitolojia únika no interessante tebes atu esplora, sai hanesan fatin ba dadur sira hosi kolónia Portugueza to’o okupasaun Indonézia, iha tasi ibun ne’ebé furak, foho Manukoko no potensialidade turístika no sidadaun ne’ebé laran luak tebes atu simu, ema hotu ne’ebé atu vizita hosi tasi balun,” Hatutan.com sita komunikadu.
Advertisement
Eventu ne’ebé Prezidénsia Repúblika organiza, atu promove duni potensialidade hirak ne’e no hamorin Timor-Leste nia naran iha mundu, tanba eventu ne’e sei partisipa mós grupu kulturál hosi munisípiu 13 no mós hosi Indonézia no fiar katak, festivál kulturál no múzika ba edisaun dahuluk iha Ataúro ne’e, sei sai dinámiku no kontribui mós ba atividade ekonómika.
Iha Ataúru realiza atividade hanesan: múzika instrumental tradisionál, dansa trandisionál, aprezentasaun filme dokumentáriu, ai-knanoik, desfile traze tradisionál, soru-tais, ai-han tradisionál no internasionál, feira livru, artezenatu, expozisaun pintura, Marxa Moradór no kuda Ai Mangrove ka parapa.
Iha mós konkursu hanesan, Poezia no múzika akústika ho tema Manu Kokorek Fanu rai Timor, Pintura kona-bá Tasi Timor, Adventure Challenge no Múzika korre metan no mós iha kompetisaun hanesan, halai sa’e foho, kurrida bisikleta BMX, Kurrida Ró no nani Tasi.