Guarda Prizionál Gleno Na’in 25 Partisipa Formasaun Kona-bá Prizaun Seguru

Hatutan.com, (21 Novembru 2022), Díli—Guarda Prizionál iha Estabelesimentu Prizionál Gleno na’in 25 partisipa formasaun kona-bá prizaun seguru ho objetivu atu hatene oinsa asegura prizioneiru sira iha situasaun kruel.

Guarda Prizionál iha Estabelesimentu Prizionál Gleno na’in 25 partisipa formasaun kona-bá prizaun seguru ho objetivu atu hatene oinsa asegura prizioneiru sira iha situasaun kruel. Foto/PDHJ.

Formasaun ne’e oferese hosi ekipa formadora mai hosi Provedoria dos Direitos Humanos e Justiça (PDHJ).

Lee Mós: PDHJ Konsiensializa Membru UPF Respeita Direitu Umanu

Formasaun ne’e rasik realiza durante loron tolu, ne’ebé hahú hosi loron 16 fulan Novembru 2022 no termina iha loron 18 Novembru 2022.

“Formasaun hodi bele hasa’e sira nia koñesimentu iha área prevensaun ba tortura, nune’e sira bele sai profisionál liu tán iha sira nia servisu lor-loron,” Hatutan.com sita liafuan Provedora Adjunta ba área Direitus Umanus, Benícia Eriana Magno liu hosi komunikadu.

Formasaun ne’e iha elaborasaun kada kapítulu iha módulu hirak ne’e esklarese pontu sira ne’ebé guarda prizionál sira enfrenta bainhira asume sira-nia funsaun no responsabilidade loro-loron nian, inklui oinsá atu implementa regra no regulamentu sira ne’ebé bandu hahalok tortura no tratamentu-aat, konstrui prizaun ida ne’ebé seguru no responsive, proteje prizoneiru sira iha situasaun hirak ne’ebé vulnerável hosi risku sira ba tortura no tratamentu-aat no servisu ho parte sira interesadu iha nível nasionál hodi prevene tortura.

Iha fatin hanesan, Diretór Prizaun Gleno, Nito Maria dos Santos lori Ministériu Justisa nia naran  agradese ba PDHJ, no ba maluk sira ne’ebé  partisipa iha elaborasaun manuál ida ne’e no agradese tanba ikus mai bele realiza programa formasaun ida-ne’e.

“Tanba matéria ida-ne’e importante ba Guarda Prizaun tanba kuaze tinan 10 ona ami la hetan matéria ida-ne’e atu refreshing fali ami nia kakutak, nune’e bele hatudu ba mundu katak, ita mós servisu bazeia ba padraun direitus umanus,” nia hateten iha Salaun enkontru Prizaun Gleno, Munisipiu Ermera.

Hafoin termina treinamentu ida ne’e, ikus-mai ekipa ensera ho atribuisaun sertifikadu ba guarda prizionál na’in  25 ne’e.

Formasaun ne’e realiza tanba iha 2020 PDHJ, Ministériu Justisa ho Asosiasaun Prevensaun Tortura (APT) iha  Jenebra, asina Memorandu Entendimentu ida atu fó formasaun ba guarda Prizionál sira kona-bá prevensaun tortura, tratamentu aat, kruel, degradante no dezumanu.

Jornalista: Rogério Pereira Cárceres