Nasionál
Konstrusaun Rezidénsia bá Irmã Franciscana Iha Laleia Tuir-duni Dezeñu
Hatutan.com, (22 Novembru 2022), Díli—Prosesu kontrusaun ba rezidensia Irmã Franciscana Missionária Nossa Senhora Laleia tuir duni dezeñe ne’ebé maki ha no sei finaliza iha tempu besik.
Konstrusaun Rezidensia Irmã Franciscana Missionária Nossa Senhora Laleia. Imajen/Media PR.
Edifísiu modernu kompostu hosi éjiu, sentru Formasaun, kampu futsál, jardin halimar ba labarik no rezidénsia komunidade relijioza provinsía Portugueza, konstrui hosi Arquiteto Cesar Almeida hosi Empresa CC Construcões Portugál ho totál orsamentu kuaze milliaun $1.
Tuir planu iha fulan Janeiru 2023, ekipa kompañia sei finaliza servisu no prosesu inagurasaun bele akontese iha fulan marsu ka abril nia laran.
Assesór Politiku Prezidente Repúblika, Tomás do Rosario Cabral ne’ebé hala’o obserbasaun ba projetu ne’e sente orgullu, tanba prosesu konstrusaun halo ho kualidade tuir dezeñu ne’ebè Irmã Franciscana sira aprezenta nu’udár na’in ba projeitu.
“Edifísiu ne’e harii iha Laleia bazeia ba kooperasaun no koordenasaun servisu entre Irmã Franciscana Missionária Nossa Senhora ho mandatu Governu Konstitusionál da-lima nian,” Hatutan.com sita komunikadu.
Iha obserbasaun ne’e, Tomás Cabral akompaña hosi Arquiteto Cesar Almeida vizita no haree direita prosesu instalasaun liña eletrisidade ne’ebé parte ékniku EDTL Manatuto instala ona trifaze ba konstrusaun koléjiu laran tomak.
Kompañia ne’e mós harii ona barajen bee boot iha rai kuak ho kuantidade boot hodi halibur udan been labele sai hodi bele utiliza iha tempu bai-loron bele rega ai-funan no ai-horis sira ne’ebé sei kuda hele’u rezidénsia ne’e iha foho leten Laleia bele sai matan nafatin.
Madre Alvina sente haksolok tebes ho vizita hosi Gabinete Prezidente Repúblika hodi ajuda sira halais servisu hotu- hotu bele finaliza prosesu konstrusaun.
Konstrusaun Rezidensia Irmã Franciscana Missionária Nossa Senhora Laleia. Imajen/Media PR.
Madre Alvina agradese tanba ho apoiu Prezidente Repúblika, José Ramos-Horta no Kay Rala Xanana Gusmão nia tulun sira nia servisu bele hetan asisténsia rapidu hosi parte kompetente sira ba asuntu ida-ne’e, ho nune’e prosesu konstrusaun bele la’o ho di’ak no lalais atu bele utiliza tuir tempu ne’ebé termina ona.
Tomás Cabrál mós informa ba Kongregasaun Franciscana no Arquiteto hosi empreza sira katak, PR Ramos-Horta no Kay Rala Xanana Gusmão rasik preokupa ho difikuldade ne’ebé komunidade Franciscana Laleia enfrenta.
Tuir planu iha tempu besik, Ramos-Horta sei hala’o vizita hodi haree besik progresu hosi konstrusaun ne’e rasik. Tamba bainhira konstrusaun ne’e remata komunidade Manatuto ho Baucau sei benefisia direta ba programa dezenvolvimentu edukasaun no atividade Igreja nian ne’ebé sei estabelese hosi Kongregasaun Irmã Franciscana Laleia.
Jornalista: Rogério Pereira Cárceres