Nasionál
Prezidénsia Repúblika Sei Organiza Kompetisaun Prezépiu Iha Díli
Hatutan.com, (23 Novembru 2022), Ataúro—Prezidénsia Repúblika (PR), sei organiza kompetisaun Prezépiu iha munisípiu Díli, iha fulan Dezembru tinan ne’e.
Avó feto ne’ebé hatutan moris iha Loja ninin. Dezembru 2021. Foto/Hatutan.com.
Prezidente Repúblika (PR), José Ramos-Horta konsidera prezépiu ne’e nu’udár atrasaun turístika relijiozu ne’ebé úniku hodi atrai ema Katóliku hosi nasaun seluk mai vizita Timor Leste.
Lee Mós: Mai Ita Fila-Fali ba Belém!
Prezidénsia Repúblika sei servisu hamutuk ho Ministériu Turizmu Komérisiu no Indústria (MTKI), Ministériu Edukasaun Juventude no Desportu (MEJD) no Igreja Katólika oinsá iha tinan foun mai, iha mós pakote boot ida kona-bá promosaun Natál iha Timor.
Xefe Estadu haree katak, Natál iha Timor espesiál tebes, prezépiu ne’ebé ema Timoroan halo ne’e rai seluk la halo.
“Tinan ne’e promosaun ka kompetisaun ba prezépiu sei iha no halo de’it iha munisípiu Díli no sei haree atu iha tinan foun mai tempu Natál promosaun no kompetisaun ba prezépiu sei halo iha Timor laran tomak no atividade relijiozu sira seluk,” Ramos-Horta hateten iha suku Beloi, Ataúro, Kuarta (23/11/2022).
Atividade relijiozu ida-ne’e sei bele atrai ema Katóliku hosi nasaun sira seluk hanesan Malázia, Singapura, Indonézia, Asutrália mai vizita Timor Leste.
Tuir Ramos-Horta, ema Katóliku iha Timor nia Natál animadu liu duké Natál iha nasaun sira seluk hanesan Natál iha Austrália buat rua de’it mak hanesan han, hemu ba misa no troka prenda ka fó prezente ba malu.
Tanba ne’e, hanesan Xefe Estadu iha mós planu no estratejia oinsa bele promove no fó valór ba atividade relijiozu sira, hodi atrai turista sira vizita Timor Leste barak liután.
Ramos-Horta husu atu komunidade no sarani sira hotu bele partisipa iha kompetisaun prezépiu ne’e atu bele fó valór ba atividade relijiozu ne’e no bele sai mós hanesam atrasaun turistiku relijiozu ne’ebé sei dada atensaun turista relijiozu sira nia atensaun no hakarak vizita Timor Leste.
Jornalista: Vito Salvadór