Defeza & Seguransa
Falur Nomeia Majór Francisco da Silva bá Xefe Kaza Militár
Hatutan.com, (24 Novembru 2022), Díli—Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”, deside hodi nomeia ona Majór Francisco da Silva bá Xefe Kaza Militár iha Prezidénsia Repúblika durante tinan lima.
Majór Francisco da Silva atuál Xefe Kaza Militár Prezidénsia Repúblika bainhira akompaña vizita Prezidente Repúblika, Jose Ramos-Horta ba Portugál. Foto/Média PR.
“Mantein ona ho ida ne’e. Foin daudaun, Sexta ha’u la bá, mais vise bá hasoru, hetan konkluzaun katak, Major Sico mak mantein,” Falur Rate Laek hateten hateten iha Kuartél Jenerál Fatuhada, Dili, Kinta (24/11/2022).
Lee Mós: Nomeasaun Xefe Kaza Militar Foun Hein Konkordánsia Prezidente Repúblika
Desizaun ida-ne’e, tanba Prezidente Repúblika (PR), José Ramos-Horta rasik mak husu katak, atuál xefe kaza militár interinu mak lidera nafatin pozisaun ida-ne’e.
“Desizaun mak ne’e ona, Prezidente nia hakarak mak ida ne’e ona. Ha’u deside ona ida-ne’e. Horibainhira, ha’u hakerek ona surat ofisiál ida bá ona,” Falur Rate Laek, informa.
Kona-bá Major Francisco da Silva ninia deviza, Jenerál fitun-tolu ne’e dehan, ida ne’e laiha problema, tanba sei iha regra atu promove bá graduasaun.
Majór Francisco da Silva atuál Xefe Kaza Militár Prezidénsia Repúblika bainhira akompaña vizita Prezidente Repúblika, Jose Ramos-Horta ba Portugál. Foto/Média PR.
Tuir loloos, Ofisial Superior sira ne’ebé ho deviza Koronel mak bele asume kna’ar nu’udár Xefe Kaza Militár iha Palásiu Prezidensiál. Maibé, tanba kondisaun F-FDTL nian oras ne’e, sira ne’ebé ho deviza Coronel, númeru sei limitadu.
“Agora ne’e ita nia kondisoins hanesan ne’e, la to’o ne’e, ita nia Koronel la to’o atu halo ona ida ne’e. Ne’ebé husik ona nia iha ne’ebá. Sei halo graduasaun, mais regra ida iha, rekezitu ida iha, nia kumpri tiha hanesan formasaun ne’e to’o tinan ida resin mak foin bele halo graduasaun,” Xefe Estadu Maiór F-FDTL hateten tán.
Molok ne’e, Koronel Renilde Corte Real Guterres e Silva, mak asume kna’ar nu’udár Xefe Kaza Militár durante fulan balun.
Jornalista: Rogério Pereira Cárceres