Ulun-Boot RDTL Halo Kontrolu Rigorozu Bá Timoroan Bainhira Sai Hosi Timor

Hatutan.com, (26 Novembru 2022), Díli-Fenómena Timoroan lubun sai vítima bá ajénsia irresponsavel sira hodi lori timoroan liu ema 5,000 bá moris terus hela iha Portugál, maka ulun-boot sira RDTL (República Democrática de Timor-Leste) tenke halo kontrolu rigorozu bá Timoroan sira bainhira sai hosi Timor-Leste.

Lee Mós : Horta Fó Orden bá PCIC ho PNTL Buka Ajénsia Fasilita Timoroan “Abandona” iha Portugál

Prezidente Repúblika Timor Leste, José Ramos-Horta ho Prezidente Repúblika Portugál, Marcelo Rebêlo de Sousa, hasoru-malu ho imigrante Timoroan ne’ebé hamahan an provizóriu iha Pavilliaun Polísia Munisipál Lisboa, Kuarta (02/11/2022). Foto/Média PR.

Antigu Ministru Ekonomia no Dezenvolvimentu, Abel Ximenes “Lari Sina” husu  ona nia emar sira hodi lori apoiu nesesidade báziku  bá   Timoroan sira ne’ebé moris terus hela iha jardín sira iha sidade Lizboa-Portugal no fatin seluk tan iha Portugal.

Abel “Lari Sina”  haree katak timoroan sira ne’ebé tuir dadus liu ema 5,000   moris difisil no terus tebetebes iha Portugal. Balun toba de’it iha jardín sira no balun toba iha loza nia tatiis sira.

 Liuhosi mensajen WhatsApp bá Hatutan.com, Abel Ximenes “Lari Sina” hateten, iha ajénsia irresponsáveis bosok no lori Timoroan barak bá servisu rai-li’ur no ikus mai halo timoroan sira ne’e hetan terus no problema barak tanba  sai objetu esplorasaun.

“Husu bá ulun-boot RDTL sira para halo kontrola rigorozu Timoroan bainhira sai hosi Timor-Leste no fó sansaun ba ajénsia sira ne’ebé hatudu ona prátika barak ne’ebé prejudika ema barak iha rai-li’ur,” Abel Ximenes hateten.

Antigu Vise-Ministru Edukasaun ne’e hato’o  agradesimentu bá Prezidente Repúblika (PR), José Ramos-Horta, bainhira iha Portugal bele hasoru joven timoroan sira moris terus iha Portugal no hamutuk ho Governu Portugés buka solusaun ba joven timoroan sira iha Lizboa.

Prezidente Assembleia Jerál Fundasaun Klibur Mata-Dalan (FKM), hanesan mós fundadór no investór úniku, Abel da Costa Ximenes. Foto/Dok.Hatutan.com

“Itá hotu hamutuk tenke buka no hetan solusaun iha Timor-Leste hanesan: reforma radikál iha setor edukasaun (ensino formal e não-formal),  insentiva, apoia no kapasita ajente ekonómiku nasionál, setór públiku empreza estatál,” Prezidente Assembleia Jerál Fundasaun Klibur Mata-Dalan (FKM) hanesan mós fundadór no investór úniku, Abel  Ximenes “Lari Sina” hateten.

Nia hatutan, setór privadu nasionál hetan priviléjiu no apoiu barak mas sira lá konsege kontribui positivamente para  bá kriasaun empregu  no presiza apoiu terseiru setór (sem fins lukrativu) hanesan kooperativa sira,  ONG sira, asosiasaun no fundasaun ho sira seluk tan.

“Ne’e hanoin balun ne’ebé ha’u hato’o bá maluk Timoroan hotu bainhira itá atu selebra tinan- 47 Proklamasaun Independensia, 28 Novembru 1975-28 Novembru 2022.  Viva RDTL!,” Abel Lari Sina hateten iha nia mensajen.  

 Jornalista : Vito Salvadór