Polítika
Halakon Lei Pensaun Vitalísia Kompeténsia Parlamentu Nasionál
Hatutan.com, (01 Dezembru 2022), Díli—Primeiru-Ministru (PM), Taur Matan Ruak hateten atu halakon Lei Pensaun Vitalísia ne’e kabe ba kompeténsia Parlamentu Nasionál (PN) no la’ós governu.
Primeiru Ministru (PM), Taur Matan Ruak.
“Kona-bá Lei Pensaun Vitalísia ne’e atividade ida Parlamentu Nasionál mak tenke deside hodi altera,” Taur Matan Ruak hateten hafoin enkontru ho Prezidente Repúblika, José Ramos-Horta iha Palásiu Prezidensiál Nicolau Lobato Bairru Pité, Kinta (01/12/2022).
Lee Mós: Hafoin PN Kansela Sosa karreta Foun, Reitór UNPAZ Organiza Estudante Ejize-tán Alterasaun LPV
Buat ne’ebé Xefe Governu hatene katak, Lei Pensaun Vitalísia ne’e iha ona ajenda PN maibé la’ós Primeiru Ministru mak tenke ko’alia kona-bá ida ne’e.
“Konserteza Parlamentu Nasionál la’ós partidu ida de’it, maibé iha ne’ebá iha partidu lubuk ida no Prezidente Parlamentu Nasionál iha nosaun no hatene preokupasaun sosiedade nian. Partidu sira seluk nian no ida ne’e kestaun ida Parlamentu Nasionál nian no la’ós Primeiru-Ministru mak tenke ko’alia kona-bá ida-ne’e,” nia subliña.
Vizita PR Ramos-Horta Bá Singapura
Iha enkontru semanál entre Xefe Estadu ho Xefe Governu ko’alia oitoan kona-bá vizita sira ne’ebé Prezidente Repúblika sei halo liu-liu vizita bá nasaun Singapura.
Singapura hanesan nasaun ne’ebé Timor Leste servisu hamutuk di’ak tebes, sira mós tulun dezenvolve Timor Leste liu hosi investimentu ne’ebé sira halo.
“Investimentu iha ita nia rain Singapura hanesan nasaun ida ne’ebé investe maka’as iha Timor Leste, foin daudaun Pelican Paradise ne’e investór hosi Singapura no Malázia no iha tán Marino Square nune’e kuantu mais vizita ne’e hametin liután ita nia relasaun, ita nia entendimentu no parseria iha kooperasaun nível ekonómiku, polítika, seguransa no mós iha aspetu kulturál,” Xefe Governu hateten.
Xefe Estadu to’o loron sei ba Singapura, pedidu ne’ebé governu iha maka sempre buka atu hametin relasaun ho membru país sira ASEAN nian tanba ASEAN aseita ona prinsipiu adezaun Timor Leste nian.
Jornalista: Vito Salvadór