CAC Hala’o Sensibilizasaun Lei MPCC bá Kuadrus PD

Hatutan.com, (05 Dezembru 2022), Díli—Comissão Anti-Corrupção (CAC) realiza semináriu loron sorin ba kuadrus politikus importante Partidu Demokrátiku (PD) kona-bá Lei Medida Prevensaun no Kombate Korrupsaun (MPCC), iha Sede PD Colmera Díli, Sesta (02/12/2022).

Comissão Anti-Corrupção (CAC) realiza semináriu loron sorin ba kuadrus politikus importante Partidu Demokrátiku (PD) kona-bá Lei Medida Prevensaun no Kombate Korrupsaun (MPCC), iha Sede PD Colmera Díli, Sesta (02/12/2022). Foto/CAC.

Sensibilizasaun ne’e lidera hosi Komisáriu CAC, Sérgio Hornai akompaña hosi Komisáriu Adjuntu ba Prevensaun no Sensibilizasaun (DPS) Luis Sampaio hamutuk no ekipa Espesialista Anti-Korrupsaun (EAK).

Lee Mós: Atividade ‘Semana Anti-Korrupsaun’, CAC Hahú Ho Sensibilizasaun Lei MPCC bá Partidu KHUNTO

Semináriu loron sorin ne’e realiza hafoin atividade semana anti-korrupsaun iha ámbitu komemorasaun Loron Mundiál Anti-Korrupsaun tinan 2022 hanesan CAC hala’o tiha ona ba Partidu KHUNTO.

Programa semináriu loron sorin ne’e ho tema, “Promove Partisipasaun Partidu Polítiku Iha Politika Estadu hodi Prevene no Kombate Korrupsaun liu hosi Lei MPCC” hahú ho kanta Hino Nasional Patria Patria hosi Prezidente PD ho estrutura no kuadru partidu polítiku PD nian hamutuk ho Komissáriu no Komissariu Adjunto CAC.

“Objetivu hosi sensibilizasaun ba partidu polítiku sira ne’e atu promove partisipasaun públiku ida poderozu liu-tán hodi unifika forsa hamutuk nu’udár movimentu nasionál ida iha asaun ne’ebé rigór ba luta prevene no kombate korrupsaun iha TL,” Hatutan.com sita komunikadu.

Komisaun organizadora ba eventu komemorasaun Loron Mundiál Anti-Korrupsaun sei realiza iha 09 Dezembru fulan ne’e, hodi konsentra hala’o konsensializasaun ba kuadrus partidu politiku sira ne’ebé hetan asentu iha PN.

Programa sensibilizasaun lei MPCC loron sorin ne’e, Komisariu Adjuntu Prevensaun no Sensibilizasaun, Luis Sampaio fokus esplika medida sira prevensaun krime korrupsaun nian ba estrutura no kuadrus sira partidu PD nian nu’udár polítika Estadu ba Estratejia Nasionál Anti-Korrupsaun (ENAK), rekrutamentu servidór povu iha setór públiku, kódigu kónduta ba ajénte públiku, publisidade no transparánsia kona-bá aprovizionamentu iha setór públiku, simplifikasaun ba prosedimentu administrativu sira, inklui rejime deklarasaun rendimentu, bens no interese nian.

Lee Mós: CAC Lansa Atividade Sanulu Hodi Komemora Loron Mundiál Kontra-Korrupsaun

Jornalista: Elio dos Santos da Costa