Xanana Gusmão Defende Referendum Sahara Osidentál

Hatutan.com, (05 Dezembru 2022), Díli—Líder Nasionál Kay Rala Xanana Gusmão defende realizasaun referendum ne’ebé livre no justu, hodi permite povu Sharaui hodi alkansa dekolonizasaun no Independénsia.

Povu Sahara Osidentál. Foto/Espesiál.

Pozisaun ne’e hato’o baihira Xanana Gumão sai konvidadu de honra iha Konferénsia hosi Koordenasaun Europeia ba Soliedariedade ba povu Sharaui – EUCOCO ne’ebé realiza iha Berlin Alemaña.

Lee Mós: Xanana Hanesan “Konvidadu de Onra” Iha Konferénsia EUCOCO

Lider nasionál ne’e mós fó hanoin katak, durante luta ba libertasaun nasionál nia mós sofre, perseguidu, assiste mate no terus oi-oin, tanba ne’e apela atu hakotu violasaun direitus umanus no explorasaun hosi okupasaun Marroko iha Sharaui.

Atu hakotu prosesu dekolonizasaun ho dame iha kolonia ikus-liu iha Afrika, Xanana dehan la’ós de’it hanesan julgamentu ba umanidade, maibé teste bá kolonizadór sira atu korrije erru iha Sahara Osidentál.

“Saida mak povu Sahara sofre antagonista, injustisa, aliansa injusta, ultrapassa rezisténsia no asisténsia liu hosi envolvimentu konstrutivu iha Planu ONU ne’ebé  falla kumpre ninia vontade no obrigasaun, hodi halo ita enfrenta responsabilidade istórika, hanesan povu lutadór bá mundu ne’ebé di’ak liu, ne’ebá iha pas, estabilidade, seguransa no konvivénsia entre povu,” Hatutan.com sita deklarasaun Xanana Gusmão iha komunikadu.

Partisipante sira iha konferensia ne’e sente xokadu no fó aplauz ba Xanana Gusmão ne’ebé hakruuk ba símbolu, revolta, firmeza no rezisténsia povu Saharaui Sultana Kha Ya, hodi louva no valoriza ninia luta hasoru okupasaun Marroko atu hetan pás.

Jornalista: Vito Salvadór