Justisa & Krime
Kazu Projetu Set-Top Box RTTL, E.P, CAC Kontinua Halo Inkéritu bá Evidénsia Hosi Arguidu Sira
Hatutan.com, (10 Dezembru 2022), Díli—Comissão Anti Corrupção (CAC) kontinua hakle’an prosesu investigasaun ka inkéritu ba faktus no evidénsia sira ne’ebé rekolla hosi arguidu sira bá kazu Kazu Instalasaun Projetu Set-Top Box RTTL, E.P, iha prosesu buska no aprensaun ne’ebé hala’o iha fulan hirak liu bá.
Komisáriu CAC, Sergio Hornai. Foto/Hatutan.com
Komisáriu CAC, Sérgio Hornai hateten prosesu averiguasaun, prosesu diligência sira ba iha investigasaun ka inkéritu ninian la’o hela no to’o iha momentu ida, hotu-hotu sei iha klareza relativamente ba iha faktus balun ka indísiu balun ne’ebé CAC suspeita.
Lee Mós: Kazu Projetu Set top Box RTTL,E P iha Prosesu Distribuisaun Ba Prokuradór Titulár
“Prosesu investigasaun ita halo hela no delegasaun de kompeténsia mós mai. Ita presiza hodi aprofunda ho didi’ak nune’e ita bele haree buat sira ne’e ho objetividade, legalidade,” Sérgio Hornai hateten ba Hatutan.com iha Ministériu Finansas, Aitarak Laran, Sesta (09/12/2022).
Komisáriu ne’e hatutan, prosesu investigasaun ba faktus no evidénsia sira CAC kontinua halo no presiza haree ho hakmatek, responsabilidade no haree ho konformidade ba iha lei no iha indisiu ka laiha indisiu CAC sei haruka ba iha Ministériu Públiku, hodi apresia investigasaun ne’e.
Relasiona ho informasaun kona-bá keixa hosi MAPKOMS hasoru pessoál balun iha CAC ne’ebé divulga informasaun iha Facebook relasiona ho aprensaun, Sérgio Hornai hateten ema hotu-hotu no sidadaun ida-idak iha direitu atu halo impugnasaun, reklamasaun ba iha aktus hotu-hotu ne’ebé mak monu ba iha instituisaun Estadu ninian, autoridade sira halo inklui CAC.
“Hanesan órgaun polisiál kriminál nian la’ós instituisaun ida intokável, ema hotu-hotu bele toka, bele uza meiu sira hodi hateten katak CAC nia servisu la loos. Ne’e normalmente iha formál no liu hosi alegasaun sira ka informasaun sira ne’ebé pessoalmente sira bele livre expressa maibé depende ba iha faktus no provas,” nia hateten.
Jornalista: Vito Salvadór