Timor-Leste Selebra Loron Nasionál Tais Hodi Valoriza Eransa Kulturál

Hatutan.com, (12 Dezembru 2022), Díli- Timor-Leste iha nia istória selebra dahuluk loron nasionál Tais ne’ebé monu iha loron 14 fulan-Dezembru 2022.

Lee Mós : Presiza Valoriza Eransa no Konserva Kualidade Tais Tradisionál

Timor-Leste selebra dahuluk loron nasionál Tais iha loron 14 fulan-Dezembru 2022. Foto/Elio dos Santos da Costa

Selebrasaun loron tais nasionál  ne’e atu valoriza eransa kulturál ne’ebé bei-ala sira husik hela nakonu ho valor kulturál no istória bá povu Timor-Leste.

Iha selebrssaun loron nasionál Tais bá dahuluk realiza hafoin Tais hetan rekoñesimetu internasionál hosi organizasaun The United Nations Educacional, Scientify and Cultural Organization (UNECO) nu’udar patrimóniu kulturál imaterial.

Tema bá selebrasaun loron nasionál Tais bá tinan 2022 nian maka “Há’u nia Tais, há’u nia identidade, lori komunidade hadomi Tais”.

Diretor Jeral Arte no Kultura, Manuel Ximenes Smith hateten, Timor-Leste  selebra Loron Nasional Tais Da-huluk iha loron 14 fulan-Dezembru ne’e, ne’ebé hetan ona rekoñesimentu internasionál UNECO iha loron 14 fulan-Dezembru 2021, nu’udár patrimóniu kulturál imaterial iha lista Salvaguarda urjente.

Parlamentu Nasionál rasik hasai no aprova kedas rezolusaun Parlamentu Nasionál númeru 2/2022, 26 Janeiru, institui o dia Nasionál do Tais e aprova recomendação ao governu para o proteção e preservação do Tais, hodi defini loron 14 fulan-Dezembru nu’udár loron nasionál no bazeia bá rezolusaun Parlamentu Nasionál ne’ebé iha hateten katak apela bá Governu, eskola sira, komunidade sira no populasaun em-jerál atu organiza asaun promosaun bá tais  kada tinan iha loron 14 fulan-Dezembru.

Komemorasaun loron Nasionál Tais ba dahuluk iha tinan ida ne’e organza konjuntu husi komité Nasionál patrimóniu kulturál Imaterial Timor-Leste hamutuk ho pro-reitor asuntu estudantil UNTL no universidade privadu sira hotu.

Konferénsia imprensa bá komemorasaun loron nasionál tais dahuluk ne’ebé sei selebra iha loron 14 fulan-Dezembru 2022. Foto/Elio dos Santos da Costa

“Tais mak hena tradisionál Timor-Leste nian ne’ebé konsideradu hanesan eransa kulturál husi beiala sira no nia ezistensia transmitidu hosi jerasaun bá jerasaun,” Manuel Ximenes Smith hateten liuhosi konferénsia imprensa iha Centro Convenção Díli (CCD), Segunda (12/12/2022).

Selebrasaun dahuluk ba loron Nasionál Tais iha tinan ida ne’e sei involve soru-na’in husi mumisípiu 14, grupu moradores, estudante Universitáriu no komunidade iha sidade Díli laran ho aktividade sira hanesan feira Tais, aprezentasaun traje tradisionál, dansa tradisionál, kompetisaun pinturs, poezia, semináriu, konversa Kultural, kompetisaun pintura no atividade artistika ho karakter kulturál.

Smith haktuir rekerimentu aplikasaun sira bá iha UNESCO rigorozu tebes no preparasaun hahu kedas iha tinan 2019. USAID nia Projetu Turizmu ba Ema Hotu fó apoiu atu ajuda autoridade Timoroan no parte interesada sira ho dalan hotu-hotu, hahú estabele komité Nasionál ba Patrimóniu Kulturál Imateriál (PKI) atu kordena prosedimentu aplikasaun nian.

Rekerimentu UNESCO nian ida mak tenke iha involvimentu hosi parte interesada oioin hahú husi reprezentante Governu to’o ONG nasionál no grupu komunidade soru-Tais nian atu segura konsensu tomak hodi suporta aplikasaun ne’e.

Lee Mós : Governu Aprova 14 Dezembru Nu’udár Loron Nasionál Tais

Jornalista: Vito Salvadór