Virgílio da Silva Guterres “Lamukan” Eleitu Nu’udár Provedór bá PDHJ

Hatutan.com, (12 Dezembru 2022), Díli—Parlamentu Nasionál (PN) liuhosi prosesu votasaun eleze ka hili ona, Virgílio da Silva Guterres “Lamukan” bá Provedór foun iha Provedoria Direitos Humanos E Justiça (PDHJ), hodi lidera instituisaun independente ne’e durante tinan haat.

Virgílio da Silva Guterres. Foto/Hatutan.com.

Sidadaun sira ne’ebé submete sira-nia rekerimentu bá Parlamentu Nasionál, hodi kandidata an bá Provedór PDHJ ne’e hamutuk na’in-lima (5) mak hanesan, Carmen Zoela Pereira, Ivo Colimau Lay Costa, Horácio de Almeida, Nelson Filomeno Rego de Jesus no Virgílio da Silva Guterres.

Lee Mós: PDHJ Detekta Kandidatu Sira Komete Irregularidade Sia

Iha rezultadu eleisaun bá primeira volta nian, deputadu PN atribui votu bá kandidata Carmen Zoela Pereira ho votus 1, kandidatu Ivo Colimau Lay Costa ho votus 29, Horácio de Almeida ho votus 4, Nelson Filomeno Rego de Jesus ho votus 0 no Virgílio da Silva Guterres ho votus 27. Enkuantu Votu branku 2, Nulu laiha.

Haktuir bá Artigu 12, Lei númeru 07/2004, 26 maiu, kona-bá estatutu Provedór PDHJ nian, artigu 12, númeru 1, hateten katak, Parlamentu Nasional dezigna Provedór PDHJ ho maioria absoluta hosi votu sira deputadu nian ne’ebé ho efetividade iha funsaun sira.

Bazeia bá lei iha leten, kandidatu na’in-lima ne’e laiha ida mak hetan maioria absoluta, tanba ne’e PN tenke prosede bá votasaun segunda volta. Kandidatu ne’ebé avansa bá segunda volta maka Ivo Colimau Lay Costa ho Virgílio da Silva Guterres.

Ikus mai, iha rezultadu votasaun segunda volta ne’e hatudu kandidatu Virgílio da Silva Guterres “Lamukan” mak hetan votu barak liu.

“Rezultadu votasaun bá segunda volta, kandidatu rua mais votadu, Ivo Colimau Lay Costa ho  votus 29. Virgílio da Guterres ho  votus 34,” Prezidente PPN, Aniceto Guterres, deklara rezultadu votasaun iha plenária PN, Segunda (12/12/2022).

PPN Aniceto Guterres afirma, Provedór PDHJ nu’udár kargu ida importante iha Timor-Leste nia Estadu direitu demokrátiku.

Hafoin rezultadu eleisaun ne’e, PPN Aniceto Guterres, liuhosi deklarasaun iha plenária PN, informa katak, tempu besik PN sei determina data serteza ruma bá realizasaun serimónia tomada-de-posse bá Provedór foun PDHJ nian.

Jornalista: Rogério Pereira Cárceres