Estadu TL Kondekora Embaixadór Xina ho Medalla Méritu

Hatutan.com, (16 Dezembru 2022), Díli—Prezidente Repúblika (PR), José Ramos-Horta kondekora Embaixadór Xína iha Timor-Leste (TL), Xiao Jianguo ho medalla méritu tanba termina ona nia mandatu durante tinan haat.

Prezidente Repúblika (PR), José Ramos-Horta kondekora Embaixadór Xína iha Timor-Leste (TL), Xiao Jianguo ho medalla méritu tanba termina ona nia mandatu durante tinan haat, Sesta (16/12/2022). Foto/Média PR.

Xiao Jianguo konsege dezenvolve relasaun ne’ebé di’ak ho Timoroan sira, apoia ekipamentu prevensaun Covid-19 no inundasaun ne’ebé akontese iha 04 abríl 2021.

Lee Mós: PM Taur Agradese Apoiu Ne’ebé Durante Ne’e Xina Oferese ba TL

“Ha’u dezenvolve relasaun di’ak ho Timoroan sira, tanba iha tinan haat liu-ba ita hasoru mudansa barak no dezafiu barak hanesan Covid-19, inundasaun ne’ebé akontese iha tinan kotuk, iha kombate ida-ne’e hasoru Covid-19. Xína nia Embaixada iha Timor-Leste sempre prontu fó ajuda ba Timor-Leste,” Hatutan.com sita deklarasaun Xiao Jianguo iha komunikadu.

Embaixadór ne’e dehan, Prezidente Repúblika, José Ramos-Horta rekoñese ninia papél iha kooperasaun bilaterál entre Timor-Leste ho Xína.

“Prezidente Repúblika, José Ramos-Horta hatete mai ha’u, Xína ezérse papel importante iha kooperasaun entre nasaun sira. Ko’alia kona-bá relasaun bilaterál entre nasaun rua ami halo buat barak ba Timor-Leste, dala ida tán ha’u espera katak, relasaun bilaterál sei hakat ba oin,” nia espera.

Kondekorasaun ho grau medalla méritu, hanesan símbolu agradesimentu ba sidadaun nasionál no internasionál ne’ebé dezempeña papel ativu no krusiál ba dezenvolvimentu demokrasia iha Timor-Leste.

Kondekorasaun ne’e bazeia ba dekretu Prezidente Repúblika N.o 97/2012, hodi fó rekuiñesimentu ba diplomata Xinés ne’ebé kontribui ba reforsu relasaun bilateral entre rai rua, pás, estabilidade no dezenvolvimentu nasionál.

Jornalista: Vito Salvadór