Ramos-Horta Apresia no Fó Konfiansa Totál bá Virgílio Guterres Lidera PDHJ

Hatutan.com, (21 Dezembru 2022), Díli—Prezidente Repúblika (PR), José Ramos-Horta kongratula Provedór Direitus Humanus no Justisa (PDHJ) eleitu Virgílio Guterres “Lamukan” no fó konfiansa totál katak sei lidera instituisaun ne’e ho diak no kualidade.

Virgílio Guterres bainhira hanesan Prezidente Conselho Imprensa (CI), hala’o audiénsia ho Prezidente Repúblika (PR), José Ramos-Horta iha Palásiu Prezidensiál Bairru-Pité. Foto/CI.

“Provedór Direitus Humanus no Justisa Virgílio Guterres ema di’ak, bem eskollidu. Nia sei servisu di’ak ho kualidade,” Ramos-Horta hateten iha salaun Oka, Surik mas, Díli, Kuarta (21/12/2022).

Lee Mós: Pedidu Rezignasaun Virgílio Guterres Aprovadu, Francisco Belo Prezidente Interinu CI

Xefe Estadu mós konsidera Provedora Direitus Humanus no Justisa sesante, Jesuina Maria Ferreira Gomes  hanesan top klasse husik eransa legadu di’ak loos.

Tanba ne’e, hein katak servisu sira kona-bá Direitus Humanus no Justisa sei di’ak liután ho mandatu Provedór foun ba períudu 2022-2026.

Provedór foun Virgílio Guterres “Lamukan” eleitu hosi Parlamentu Nasionál (PN) liuhosi prosesu votasaun ne’ebé hala’o iha loron 12 fulan Dezembru 2022.

Sidadaun sira ne’ebé submete sira-nia rekerimentu bá Parlamentu Nasionál, hodi kandidata an bá Provedór PDHJ ne’e hamutuk na’in-lima (5) mak hanesan, Carmen Zoela Pereira, Ivo Colimau Lay Costa, Horácio de Almeida, Nelson Filomeno Rego de Jesus no Virgílio da Silva Guterres.

Iha rezultadu eleisaun bá primeira volta nian, deputadu PN atribui votu bá kandidata Carmen Zoela Pereira ho votus 1, kandidatu Ivo Colimau Lay Costa ho votus 29, Horácio de Almeida ho votus 4, Nelson Filomeno Rego de Jesus ho votus 0 no Virgílio da Silva Guterres ho votus 27. Enkuantu Votu branku 2, Nulu laiha.

Haktuir bá Artigu 12, Lei númeru 07/2004, 26 maiu, kona-bá estatutu Provedór PDHJ nian, artigu 12, númeru 1, hateten katak, Parlamentu Nasional dezigna Provedór PDHJ ho maioria absoluta hosi votu sira deputadu nian ne’ebé ho efetividade iha funsaun sira.

Bazeia bá lei iha leten, kandidatu na’in-lima ne’e laiha ida mak hetan maioria absoluta, tanba ne’e PN tenke prosede bá votasaun segunda volta. Kandidatu ne’ebé avansa bá segunda volta maka Ivo Colimau Lay Costa ho Virgílio da Silva Guterres.

Ikus mai, iha rezultadu votasaun segunda volta ne’e hatudu kandidatu Virgílio da Silva Guterres “Lamukan” mak hetan votu barak liu.

Jornalista: Vito Salvadór