Estádiu Manatuto Paradu Tanba Na’in Bá Empreza Konstrutór Mate

Hatutan.com, (30 Dezembru 2022), Díli- Projetu konstrusaun bá Estádiu Munisipál Manatuto ne’ebé Governu gasta ona osan povu nian ho montante millaun S1,2 paradu to’o ohin loron, tanba na’in bá empreza konstrutór Obrai Unipessoal, Lda,  mate hafoin hala’o tratamentu iha Tailándia.

SEJD Abrão Saldanha. Foto/Elio dos Santos da Costa

Bá Hatutan.com iha ámbitu selebrasaun Natal hamutuk Sekretaria Estadu Juventude Desportu (SEJD) nian ne’ebé hala’o iha salaun Komisaun Nasionál bá Eleisaun (CNE, sigla portugés), Kinta (29/12/2022), SEJD Abrão Saldanha, hateten konstrusaun ba Estádiu Munisipál Manatuto paradu tamba João Martins nu’udár na’in bá empreza konstrutór Obrai mate iha Thailandia husik hela projetu ne’e.

Estádiu Manatuto, tuir Abrão Saldanha,  loloos hotu tiha ona iha tinan ida ne’e (2022), uluk lala’o tiha ona, maibé ho esforsu konsege lao lais los tiha, no demora iha verifikasaun Ajénsia Dezenvolvimentu Nasionál (ADN) no Obras Públika ne’ebé lori fulan tolu, maibé konsege ultrapassa difikuldade ida-ne’e, no SEJD iha ona kalendariu konkretu atu halo hotu, maibé na’in bá empreza Obrai mate.

“Na’in ba empreza mate tiha entaun prosesu ne’e ami tenke lori ba KAFI ho Tribunál para deklara na’in bá empreza ne’ebé mate para oinsa sira hetan fali na’in foun hodi mai hamoris kontratu ho Governu para finaliza obra konstrusaun bá estádiu Manatuto,” SEJD, Abrão Saldanha hateten.

Loloos konstrusaun bá estádiu Manatuto hotu tiha ona, tamba hela de’it porsentu 18 (18%), mak estrada iha estádiu oin ne’e de’it,  maibé problema mak na’in bá empreza mate entaun iha hela prosesu ho empreza ne’e atu iha fali administrador foun para reprezenta empreza ko’alia ho Estadu hodi hetan fali kontratu foun.

“Pagamentu ba estadium munisípiu Manatuto seidauk remata, no ate empreza halo servisu barak liu tiha ona, maibé labele selu tamba empreza nia na’in mate, no laiha ema ida mak bele asina osan para foti osan iha banku, entaun ami tenke hein muda lai empreza nia na’in,” Nia klarifika.

Estádiu Díli

Kona-bá estádiu Munisipál Díli ne’ebé to’o agora la iha mudansa, governante ne’e hateten prosesu SEJD nia remata ona no sei nafatin hein husi KAFI no ADN atu bele halo pagamentu bá empreza ida ne’ebé kaer obra ne’e para bele kontinu. Maibé, kampu Díli nia problema avansa nafatin ho dezeñu ida agora maka kampu ne’e laestandar nafatin tamba ne’e buat ne’ebé hanoin maka saida mak ko’alia ona ho FIFA liuhusi FFTL no prosesu negosiasaun ho FFTL remata ona falta deit ho Ministériu Justisa atu bele fo atribuisaun rai  bá estádiu nian.

“Uainhira atribuisaun rai estádiu nian hotu ona, ita bele rezolve ho FIFA para sira bele tau sira nia osan para estádiu Díli ne’e tuir rekizitu FIFA nian nune’e sira lalika ona mai avalia maibé halo ne’e tuir kedas ona sira nia rekizitu,” Abrão Saldanha tenik.

Estadium Munisípal Díli ho valor projetu millaun $1, maibé selu tiha ona $800,000 bá iha empreza ida tuan ne’ebé kaer obra ne’e no orsamentu ne’ebé Governu preve ho adisionál hamutuk millaun $2.

Jornalista: Vito Salvadór