Hatutan.com, (01 Janeiru 2023), Díli- Prezidente Republika (PR), José Ramos-Horta, konsidera falesimentu Papa Emeritus Bento XVI hanesan lakon boot bá igreja Katólika no mós bá sarani sira iha Timor-Leste.
Ramos-Horta harosu malu ho Papa Papa Bento XVI iha Ramo iha tinan 2006. Foto/Dok.Espesiál
Xefe Estadu Timor-Leste ne’ebé hala’o hela vizita Estadu nian iha Brazil konsidera Papa Emeritus Bento XVI hanesan pensador teolójiku no filósofo ne’ebé fó kontribuisaun boot bá kreda universal. Maske nune’e, Xefe Estadu nafatin iha konfiante bá Papa Francisco nia lideransa hodi nafatin konduz igreija katólika.
“Nia idade avansadu teb-tebes, tan ne’e nia mós resgina-an tan nia hateten, nia la aguenta ho stress, servisu todan nu’udar Papa, tan ne’e Papa Francisco hetan eleisaun iha Kolégiu Kardinal sira, ho nia i’is kotu, Igreija lakon ninia pensador teolójiku, pensador filozófiku, númeru um iha igreija, Papa Eméritus Bento XVI, koñesidu nu’udár teologu bo’ot ida hosi Alemaña” Prezidente Repúblika, José Ramos-Horta hateten tuir komunikadu ne’ebé Hatutan.com sita, Domingu (01/01/2023).
Advertisement
Durante ne’e, Ramos-Horta hasoru malu dala tolu ho Papa Emeritus Bento XVI iha Roma (Itália) no Sydney (Austrália).
“Hasoru primeira vez, waihira hanesan Primeru Ministru iha 2006, momentu krize, bá Roma nia simu ha’u nu’udar Primeiru Ministru, depoiz ha’u hetan eleisaun nu’udár Prezidente ha’u ba Roma, dala ida tan simu ha’u nu’udár Xefe Estadu no terseira vez hasoru nia iha Sydney, momentu enkontru Movimentu Mundial Juventude ne’ebé Timor oan atus ba atus mós partisipa,” Ramos-Horta haktuir.