Timor-Leste ho Ángola Haree Oportunidade Investimentu iha ASEAN

Hatutan.com, (03 Janeiru 2023), Díli–Prezidente Repúblika (PR), José Ramos-Horta ho nia omólogu Prezidente Ángola, João Lourenço, Segunda (02/01/2023), hasoru malu iha Hotel Royal Tulip Brazília, hodi diskute kona-bá kooperasaun bilaterál, liu-liu oportunidade sira atu halo investimentu iha ASEAN  inklui loke Embaixada Ángola nian iha Díli.

Lee Mós : Horta Nia Prezensa iha Brazil Hato’o Solidariedade

Prezidente Repúblika (PR), José Ramos-Horta hasoru malu ho nia omólogu Prezidente Ángola, João Lourenço. Foto/GPR

“Ministru Negósiu Estranjeiru Ángola sei mai vizita Timor iha tempu badak no Prezidente Ángola mós hakarak vizita, tanba nunka Prezidente Ángola ida mai Timor-Leste no sira sei haree loke embaixada ida,” Prezidente Republika (PR), José Ramos-Horta haktuir iha karta komunikadu ne’ebé Hatutan.com  asesu.

Tuir Xefe Estadu, Ángola hanesan produtór pertróleu, ho kuantidade barríl millaun rua kada loron, produtór diamante, osan-mean, karvaun no seluk tán no empréza Angolana balun mós investe ona iha Xina no sai proprietária bá rezidénsia estrela (andar) 20 to’o 30 iha Singapura.

Kona-bá oportunidade investimentu iha ASEAN,  Xefe Estadu dehan, adezaun Timor-Leste bá ASEAN sei sai hanesan plataforma investimentu bá nasaun membru CPLP sira.

“Timor-Leste iha tempu badak, 2023, 2024, 2025, bele tama iha ASEAN, bele sai hanesan plataforma ida para rai sira hanesan Ángola, Portugál, Brazil, bele halo investimentu, koloka sira-nia produtu iha Timor-Leste, rai sira-ne’e iha meius indústria, bele uza Timor-Leste hanesan plataforma, hodi halo reesportasaun bá nasaun sira iha ASEAN,” Xefe Estadu fundamenta.

Prezidente Ramos-Horta afirma, Timor-Leste bele sai hanesan armajén bá transaksaun produtu hanesan modelu komérsiu ne’ebé Singapura opta, hodi akomoda produtu imporadu hosi nasaun seluk.

“Brazil ha’u husu bá sira loke fábrika medikamentu, Portugál loke fábrika medikamentu, indústria modas, roupa, tanba Portugal ein-termus indústria moda nian, boot teb-tebes iha mundu, halo sapatu ho kualidade, agora Portugál númeru daruak, hafoin Itália no Timor-Leste bele sai hanesan armajén bá produtu sira-ne’e hotu, hodi fa’an fila-fali ba nasaun seluk,” Ramos-Horta hateten.

Tuir Prezidente  Repúblika, enkontru ho líder no entidade importante sira iha eventu internasionál sira, hanesan parte integrante iha diplomásia no Timor-Leste tenki ativu liu-tán.

Jornalista: Vitó Salvadór