“Sidadaun estranjeiru na’in 17 ne’e hetan prende hosi Forsa Rezerva hamutuk ho Servisu Informasaun Polisia (SIP) Komandu PNTL Viqueque, iha área Suku Carau Balu, Postu Administrativu Viqueque Vila, Munisipiu Viqueque. Sira uza fali vistu turista hodi hala’o fali servisu,” Hatutan.com sita esplikasaun Komandante Ernesto iha komunikadu, Kinta (05/01/2023).
Advertisement
Bainhira Servisu Migrasaun hetan kontaktu, ekipa tun kedan bá Munisipiu Viqueque hodi foti sidadaun estranjeiru hirak ne’e mai iha sede Servisu Migrasaun Vila-Verde Dili hodi halo verifikasaun ba sira nia dokumentus no loke prosesu ba sira.
Kapturasaun ba sidadaun estranjeiru hirak ne’e uza vistu turista hodi fa’an fali sasan hirak hanesan roupa, osan-me’an no sasan eletróniku balun.
“Ohin ita halo verifikasaun no konsege detekta sidadaun estranjeirus nain 17 ne’e viola vistu, tanba uza sala vistu turista hodi fa’an fali sasan. Entaun, ita fó sansaun ba sira hodi selu multa no loke prosesu hodi aplika abandona voluntária haruka sira sai hosi territóriu nasionál,” subliña.
Vistu turista destina de’it ba estranjeiru sira ne’ebé mai hala’o viajen hodi vizita fatin turizmu sira iha territóriu nasionál, ba sidadaun estranjeiru sira ne’ebé ho vistu turista sei la autoriza hodi exerse kualkér atividade profesionál iha territóriu nasionál.
Sidadaun estranjeiru hirak ne’e sei haruka fila ba nasaun orijen Indonézia no sei bandu tama territóriu nasionál durante tinan rua nia laran.