Hatutan.com, (06 Janeiru 2023), Díli—Komunidade sira iha área Delta, Díli, Sesta dadeer (06/01/2023), hakfodak no nadodon bá lokál akontesimentu hodi haree raan ne’ebé fakar hela iha trotoar leten iha área Delta Elemloi, Comoro, Díli.
Komunidade sira haree lokal akontesimentu ema deskoñesidu oho joven ida iha Delta, Díli, Sesta dadeer (06/01/2023). Foto/Elio dos Santos da Costa
Tuir informasaun ne’ebé Hatutan.com rekolla hosi sasin sira iha lokál akontesimentu katak ema deskoñesidu sona joven ida no mate fatin kedas purvolta tuku 02:00 madrugada.
Liu minutu balun de’it, komunidade sira ne’ebé haree joven vítima ne’ebé la iha ona iis no toba ho ran sai maka’as ne’e, kontakta bá polísia hodi mai fatin akontesimentu no foti hikas mate isin evakua bá Hospital Nasionál Guido Valadares (HNGV).
Sasin balun hateten, joven vítima ne’ebé hatais kalsa metan badak no kamiza koor-mean la’o ain mai hosi Delta 4 atu tuun bá Fatuhada. Maibé, to’o iha estrada Delta Elemlio nian hetan sona hosi ema deskoñesidu no monu mate kedas iha fatin.
Advertisement
Bainhira polísia sira to’o mai, vítima nia kondisaun ran fakar maka’as no la iha ona iis. Nune’e, polísia halo kedas evakuasaun mate-isin bá HNGV no Polísia kontinua halo investigasaun hodi identifika suspeitu deskoñesidu ne’ebé hakotu joven vítima ne’e nia vida.
Daudaun ne’e, ema lubun inklui família balun hamriik hela iha fatin akontesimentu no ema hirak ne’ebé ho motor ka karreta liuhosi lokál akontesimentu sempre para ahree tanba raan sei fakar hela iha trotoar leten.
Iha terrenu akontesimentu, Polísia tau ona fita polísia nian ka police line no ran fresku sei butuk hela iha trotoar letan, fatin matebian monu no hakotu iis.