Defeza & Seguransa
Komisáriu Faustino ho Vise-Ministru Interiór Preokupa Númeru UPF Iha Fronteira Limitadu
Hatutan.com, (06 Janeiru 2023), Díli—Komandante Jerál Polísia Nasionál Timor-Leste (PNTL), Komisáriu Polísia Faustino da Costa, preukupadu tebes ho kuantidade membru Unidade Patrullamentu Fronteira (UPF) ne’ebé oras-ne’e kolokadu hodi asegura liña fronteira Terrestre sei limitadu tebes.
Vise-Ministru Interiór, António Armindo hamutuk ho Komandante Jerál PNTL, Komisáriu Polísia Faustino da Costa no Segundu Komandante Jerál Komisáriu Mateus Fernandes. Foto/MI.
Komisáriu Faustino preokupa tanba tuir kritériu, kada postu seguransa tenke koloka membru na’in-ualu bá leten, maibé tanba númeru membru UPF limitadu, nune’e komandu deside halo mudansa ka rotasaun serbisu, foti membru hosi unidade seluk bá reforsa seguransa iha fronteira.
Lee Mós: Deskobre fukun-sira fó espasu ba pasajen ilegál buras iha fronteira
“Iha área fronteira ne’e situasaun ida ne’ebé mak sai nafatin dezafiu boot maka rekursu umanu. Katak ho membru ne’ebé limitadu, ami tenta foti hosi komandu munisípiu sira. Maibé ita la responde 100% tuir estrutura loloos katak, kuandu seksaun ida mínimu ema na’in-ualu to’o na’in-sia. Realidade, ami koloka postu balun na’in-haat de’it,” Faustino da Costa hateten hafoin avaliasaun serbisu PNTL nian durante 2022, iha Centro de Formação Policia (CFP), Comoro, Sesta (06/01/2023).
Postu seguransa sira ne’ebé instala iha fronteira terrestre, postu ne’ebé mista tanba membru hirak ne’ebé destakadu hodi fó seguransa, la’ós de’it hosi UPF maibé komandu foti mós hosi Unidade Espesiál Polísia (UEP) ne’ebé koloka mós iha fronteira.
“Esperansa maka, karik tinan ida-ne’e ka tinan oin sei bele iha alterasaun ruma hodi halo rekrutamentu, ne’e buat ida di’ak tanba estatutu orgánika ezíje atu mais de 100 pesoas membru ne’ebé liu ona idade 60, agora buat ne’e ita halo hela preparasaun ida atu sira bele la’ós bá pré-aprezentasaun, maibé tama bá aprezentasaun ka reforma,” Faustino da Costa hateten.
Nune’e mós Vise-Ministru Interiór, António Armindo dehan, kestaun rekursu ne’e la’ós Komandante Jerál de’it mak kestiona, maibé ema hotu-hotu kestiona inklui António Armindo rasik mós hanoin dehan katak, rekuru bá PNTL ne’e seidauk natón.
Agora daudaun, Governu liuhosi Ministériu Interiór hamutuk ho Komandu PNTL inklui ho tulun hosi parseiru sira aumenta tán ona postu seguransa iha liña fronteira, signifika ida-ne’e presiza duni ema.
“Maibé naturalmente Komandante Jerál bele ko’alia, ha’u bele ko’alia mós, ne’e bazeia mós bá orientasaun politika governu nian. Ida ne’ebé mak superiór dehan katak labele, mak ne’e de’it, labele. Tanba tuir kadeia komandu nian ne’e, ierarkia kuandu ministru hateten dehan labele, maka ha’u hanesan vise ho Komandante Jerál ho sira seluk mós tenke hateten dehan katak labele, tanba saida mak labele ezíje ne’e dozobediénsia,” nia hateten.
Governante ne’e dehan, sira hotu kumpri katak, desizaun ida-ne’e Governu nian atu hadi’a tiha lai difikuldade sira iha uma-laran, hadi’a tiha lei sira ne’e, depois mak hahú hanoin kona-bá PNTL ninia kuantidade atu aumenta membru liuhosi rekrutamentu foun.
Iha Agostu 2021, Komandante UPF, Superintendente Polísia, Euclides da Costa Belo hateten, Autoridade seguransa Timor-Leste (TL) seidauk bele kombate pasajen ilegál iha liña fronteira terrestre no tasi tanba parte seguransa enfrenta problema prinsipál neen (6) ne’ebé sai fukun.
Fukun dahuluk maka, distánsia entre postu vijilánsia ida ba postu vijilánsia seluk, dook tebes kuaze kilómetru haat (4) to’o lima (5), halo membru Polísia Nasionál Timor-Leste (PNTL), Unidade Patrullamentu Fronteira (UPF) labele kontrola movimentu ema iha tempu kalan, liuliu sira ne’ebé hala’o negósiu ilegál.
Fukun daruak nian, parte UPF laiha fasilidade sufisiente hanesan transporte no seluk tan atu bele ajuda hodi halo detensaun lalais no sedu ba ema ho sasán ne’ebé hakat liu fronteira ho dalan ilegál ka baibain ema bolu liuhosi laho nia dalan (jalan tikus).
Da-toluk, maka estrada ne’ebé sai difikuldade boot ba movimentu membru UPF-nian iha liña fronteira, inklui liña eletrisidade ne’ebé difikulta mós movimentu iha tempu kalan.
Da-haat, to’o agora númeru membru UPF sei limitadu, nune’e iha distribuisaun turnu ba vijilánsia limitadu mós, ne’ebé la konsege kobre área ne’ebé luan tebes hahú hosi Batugade-Bobonaro tama to’o Covalima, la konta ho área fronteira parte tasi.
Da-limak, to’o oras-ne’e parte UPF seidauk iha ninia estratéjia própriu atu bele halo kontrolu ho efetivu hodi bele hakotu korrente pasajen ilegál ne’e.
Da-neen, oras-ne’e daudaun totál membru UPF efetivu ne’ebé asegura ka sai lutu bá fronteira Terrestre Repúblika Demokrátika Timor-Leste (RDTL) hamutuk 300-resin, no ida-ne’e seidauk sufisiente atu bele kontrola fronteira rai-maran tomak.
Jornalista: Rogério Pereira Cárceres