Saúde
JICA Oferese Ekipamentu Teste Mikrobiolojia bá Laboratóriu Nasionál no UNTL
Hatutan.com, (11 Janeiru 2022), Díli- Japaun Internasionál Cooperation Agency (JICA), Kuarta (11/01/2023), apoiu tan ekipamentu teste mikrobiolojia bá Ministériu Saúde atu fasilita servisu sira iha laboratóriu nasionál no Universidade Nasionál Timor-Lorosa’e (UNTL), hodi bele halo teste PCR inklui bá moras sira seluk hanesan HIV-SIDA, tuberkuloze no seluk tan.
Lee Mós : Empréstimu Millaun $121 ba Fornesimentu Bee Moos iha Díli Sei Implementa iha Outubru
Reprezentante JICA iha TL, Ko Goto, asina MoU ho Ministra Saúde, Odete Freitas Belo. Foto/Elio dos Santos da Costa
Ministra Saúde, Odete Belo hateten, apoiu ida ne’e la’ós foin mak mai, maibé desde uluk kedas Governu Japaun li husi JICA hakarak apoiu Ministériu Saúde tamba haree bá servisu ne’ebé barak liu-liu liga ho servisu laboratóriu nasionál nian.
Mákina ne’ebé iha ne’e prefere liu bá teste Covid-19 hanesan PCR teste, maibé bele mós halo teste ba mikrobiolojia nian, hanesan teste HIV-SIDA, Tuberkuloze inklui mós ba moras seluk.
Mákina tolu ne’ebé JICA oferese ba Ministériu Saúde atu utiliza iha laboratóriu sira, nune’e rua sei lori ba laboratóriu nasionál no ida bá laboratóriu UNTL nian atu fasilita servisu Saúde nian inklui pratika ba estudante sira.
Embaixadór Japaun iha Timor-Leste, Kimura Tetsuya iha nia intervensaun hateten, apoiu ida ne’e ho orsamentu $130,000.00, no suporta ida-ne’e atu haree liubá hasae kapasidade iha laboratóriu nasionál no mós iha UNTL, ho objetivu atu tulun estudante sira iha koñesimentu di’ak bá iha parte saúde nian.
“Ne’e hanesan pilar prinsipál ida husi ita-nia kooperasaun internasionál atu avansa iha kobertura saúde universál bá nasaun hotu-hotu atu proteje no kapasita parte sira ne’ebé vulneravel liu iha sosiedade. Ami hakarak servisu hamutuk ho Governu no povu Timor-Leste ho objetivu ida-ne’e,” Kimura Tetsuya hateten.
Iha tinan tolu ikus ne’e povu Japaun fó ona apoiu maizumenus millaun $20 iha asisténsia saúde liga ho vasina doze besik 370,000, inklui fasilidade sira seluk hanesan asisténsia ne’ebé iha ligasaun ho Covid-19.
Jornalista: Vito Salvadór