Hatutan.com, (11 Janeiru 2023), Díli—Konsellu Ministru (KM) liu hosi sorumutuk iha Palásiu Governu, Díli, aprova ona projetu Dekretu-Lei ne’ebé aprezenta hosi Ministru Finansas, Rui Augusto Gomes, kona-bá Kriasaun Komisaun Nasionál Aprovizionamentu (KNA),I.P. no aprova ninia estatutu rasik.
“Hafoin liu tiha dékada ida dezde kriasaun Komisaun Nasionál Aprovizionamentu no haree ba volume no kompleksidade prosedimentu aprovizionamentu ne’ebé halo hosi KNA, nune’e presiza atu aumenta kapasidade jestaun no autonomia KNA nian atu hasa’e efisiénsia no efikásia aprovizionamentu nian iha Setór Públiku Administrativu no kapasidade resposta KNA nian,” Hatutan.com sita komunikadu, Kuarta (11/01/2023).
Lee Mós: KM Nomeia Pedro Godinho ho António Lelo-Taci Lidera Institutu Públiku Foun Rua
Haree mós ba Dekretu-Lei n.22/2022, loron 11 fulan-maiu, alarga ona atribuisaun Komisaun Nasionál Aprovizionamentu, ne’ebé importante tebes atu adapta natureza no rekursu hosi ninia tarrefa ne’e, liuhosi transformasaun ema koletiva públika ida, ho forma institutu públiku nian.
Antes ne’e Governu estabelese KNA atu presta serbisu aprovizionamentu ne’ebé di’ak liu iha Ministériu sira ho instituisaun públika sira liuliu iha projetu infraestrutura sira ne’ebé ho nia grau boot atu bele halo akuntabilidade másima bá projetu liuliu halo transperánsia di’ak liu.
Jornalista: Rogério Pereira Cárceres
