MOP Promete Halo Manutensaun bá Estrada Rurál Sira Molok Eleisaun Parlamentár

Hatutan.com, (11 Janeiru 2023), Díli—Ministru Obras Públikas (MOP), Abel Pires promete katak, iha ‘tempu badak nia laran’ sei halo manutesaun totál bá estrada rurál sira hodi fasilita konektvidade populasaun nian iha festa demokrasia, liu-liu kampaña bá Eleisaun Parlamentár tinan ne’e.

Ministru MOP, Abel Pires.

Abel Pires rekoñese estrada barak mak sei aat no ida-ne’e la’ós Ministériu hanoin de’it, maibé governu implementa daudaun ona.

Lee Mós: Projetu Reabilitasaun Estrada Laga-Baguia Sei Gasta Millaun $21-resin

Iha semana kotuk, Ministru ne’e realiza ona sorumutu ho ekipa diresaun nasionál bá manutesaun atu ho esforsu tomak sei halo duni manutensaun totál.

“Ne’e auguenta bá fasilita eleisaun no mós aguenta bá preparasaun dezeñu sira. Ita lakohi husik dalan ku’ak hela hanesan ne’e. Ita halo manutensaun atu prepara kondisaun hodi halo rehabilitasaun totál,” Abel Pires hateten hafoin sorumutu Konsellu Ministru ordináriu iha Palásiu Governu, Díli, Kuarta (11/01/2023).

Iha semana kotuk Abel Pires bá to’o Gleno, Letefoho hodi haree estrada atu halo manutensaun, tanba tuir planu governu nian sei halo lansamentu estrada hosi Postu Administrativu Letefoho bá Postu Administrativu Hatubuilico, Ainaro.

Molok halo lansamentu, governu sei hahú uluk ho tipu manutensaun depois tama kedan ho prosesu dezeñu no tenderizasaun bá estrada konstrusaun rasik hosi Gleno bá Letefoho.

La’ós ne’e de’it, MOP sei halo manutensaun estrada hosi Gleno bá Ermera Villa Hatulia no ida-ne’e tenki halo duni.

Iha loron rua liubá, ekipa MOP tun ona bá terrenu hodi halo kalkulasaun tékniku no ne’e halo manutensaun de’it, seidauk halo konstrusaun.

Kona-bá prosesu rehabilitasaun estrada hosi Letefoho bá Atsábe to’o bá Suku Lourbá, MOP dehan oras-ne’e la’o hela no responsábiliza hosi nasionál ida mak halo hela serbisu manutensaun iha terrenu.

“Ita tenke halo tán manutensaun hosi parte lorosa’e nian, Uatulari bá Viqueque Villa, bá Natarbora, Betano bá Hato-Udo. Agora, hosi Hato-Udo bá Cassa, bá Hare-ka’in, ne’e manán na’in iha ona atu halo manutensaun. Agora ita hein aumenta tán manutensaun bá Cassa bá Sarae, dalan bá Ainaro,” Abel hateten.

Jornalista: Rogério Pereira Cárceres