Arguidu Sona Damazo Correia Guterres Iha Ponte BJ Habibie Kumpre Prizaun Preventiva

Hatutan.com, (12 Janeiru 2022), Díli—Tribunál Distritál Díli (TDD) liu hosi audiénsia primeiru interrogatóriu, aplika prizaun preventiva  bá arguidu OdxX ne’ebé hakanek vítima Damazo Correia Guterres iha área ponte BJ Habibie.

Tribunál Distritál Díli (TDD) aplika prizaun preventiva bá arguidu OdxX ne’ebé hakanek vítima Damazo Correia Guterres iha área ponte BJ Habibie, Kinta (12/01/2023).

Defensór Públiku, Francisco Caetano Martins informa, desizaun ne’e TDD foti atu assegura prova sira no mós asegura arguidu labele komete krime seluk durante prosesu investigasaun ne’e la’o.

Lee Mós: PNTL Kaptura Autór Sona Damazo Guterres iha Ponte B.J. Habibie

“Ohin foin mak rona leitura despaixu judisiál hosi Tribunál nian, hodi aplika prizaun preventiva bá arguidu ne’e,” Francisco Caetano Martins hateten iha TDD, Kinta (12/01/2023).

Arguidu OdxX  ne’e promovidu bá krime omesídiu ho forma atentadu iha artigu 138 kódigu penál ne’ebé imputa bá nia, inklui krime arma branka númeru 7/2017 tanba arguidu lori arma hodi hakanek ema.

“Ameasa ba arguidu ne’e bele tama prizaun to’o tinan 25. Maibé bainhira iha ona provas mak foin bele haree. Agora Tribunál haree katak ida-ne’e krime públiku, nune’e arguidu la merese atu hela iha liur no tenke submeta ba prizaun preventiva se la’e bele kontinua halo tán krime ba ema seluk,” nia haktuir.

Defensór ne’e mós promete katak, Defensoria Públika sei kontinua fó asisténsia ba arguidu to’o prosesu ne’e tránzitu em julgadu.

Kazu insidente sona kanek vítima iha área Bidau, besik Ponte BJ Habibie akontese iha Sábadu (07/01/2023) tuku 21:45 Otl no vítima sei hala’o hela tratamentu saúde iha Hospital Nasionál Guido Valadares (HNGV), Bidau Díli.

Tersa (10/01/2023), Polísia Nasionál Timor-Leste (PNTL) Munisípiu Manufahi, kaptura ona joven mane ida ho inisiál OdxX  deskonfia nu’udár autór bá kazu tentativa omesídiu ne’e.

Lee Mós: Vítima Ne’ebé Hetan Sona iha Área Ponte Habibie Seidauk Fó Informasaun bá Polísia

Jornalista: Rogério Pereira Cárceres