PNTL ho F-FDTL Tenke Buka Solusaun bá Situasaun Rai-Laran

Hatutan.com, (13 Janeiru 2023), Díli– Tenente Jenerál (reformadu), Titór Cristóvão da Costa “Lere Anan Timur”, dezafia komandu Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL), atu hamutuk buka solusaun bá situasaun iha rai-laran ne’ebé sempre akontese kazu asalta malu to’o hakotu ema nia vida.

Lee Mós : F-FDTL Sei La Intervein Kompeténsia PNTL iha Seguransa Interna

Tenente Jenerál (reformadu), Titór Cristóvão da Costa “Lere Anan Timur”. Foto/Elio dos Santos da Costa

Lere Anan Timur hateten, situasaun krime sira ne’ebé mak mosu ne’e, tanba akompaña ho tinan foun 2023. Situasaun ida-ne’e konsidera ladi’ak, tanba iha Postu Administrativu Loré, joven ida mate iha 01 fulan-Janeiru 2023 no iha fali loron 06 fulan-Janeiru, joven ida mate tan iha Dili (kazu omisídiu Delta-Elemlio).

La’os ne’e de’it, iha Postu Administrativu Iliomar, akontese mós kazu insidente taa-malu no oho malu. Maibé, Lere dehan, ema hotu liu-liu bá ukun-na’in sira tenke buka solusaun bá problema sira ne’e, tanba nia hanesan sidadaun baibain, no nia laiha kompeténsia ida.

“Ne’e mak ha’u hanoin katak, ukun-na’in sira ne’e, sé ha’u mak uluk sei komandan forsa karik, pelumenus ha’u toma desizaun ruma ona. Maibé, agora, ha’u hanesan sidadaun baibain, ha’u husu de’it bá ukun-na’in sira, liu-liu polísia, F-FDTL, Governu, Ministru Interior, Ministru Defeza, buka resposta bá situasaun ida-ne’e, purke timor ne’e ki’ik-oan,” Tenente Jenerál (reformadu), Titór Cristóvão da Costa “Lere Anan Timur”, hateten bá Hatutan.com iha ámbitu seremónia aniversáriu Komponente Navál dala-21 iha baze Navál, Hera, Kinta (12/01/2023).

Lere Anan Timur husu liu-liu bá ukun-na’in sira tenke halo reflesaun, buka hatene problema sira-nia hun, nia abut, tanba saida mak problema sira-ne’e mosu.

Lere dehan, dezde uluk kedan, nia sempre fó hanoin katak, ema ida labele halimar ho vida Estadu ninian, vida povu nian, tanba rai ida-ne’e, harii ho ruin no isin, no ema barak maka terus, ema barak mate.

“Ita labele aproveita ema-nia terus, ema-nia susar mai estraga tán nasaun ida-ne’e, labele. Labele akontese,” Lere Anan Timur tenik.

Lere Anan Timur konsidera krime sira ne’ebé ohin loron mosu, iha inisiu 2023 ne’e, klasifika nu’udár krime  organizadu. Kauza esploradika, ka la’os, devezenkuandu, ne’e krime organizadu. Tanba ne’e, sé krime organizadu ona, autoridade kompotente sira tenke kombate.

Eis Xefe Estadu Maiór F-FDTL ne’e husu autoridade seguransa ho defeza  tenke servisu hamutuk, tenke fó brani bá malu, lalika ta’uk. Biar situasaun sira ikus-ikus ne’e ema kritika F-FDTL, dehan baku ema, baku joven.

“Ha’u dehan loos, F-FDTL ho PNTL ne’e sala de’it. Joven sira oho malu ne’e, imi la kritika. Ida ne’e demais, ha’u iha forsa, komandante nafatin karik, tau. Tau ha’u responsábiliza. Sé bá interese nasaun ninian, ha’u responsábiliza, mais agora, depende, bá komandu PNTL ho F-FDTL, sira mak deside, ita labele hein  Governu, tanba ne’e, mais tékniku, mais tátika operasional ne’e, sira mak hatene. Mais tenke fó responsábilidade bá instituisaun rua ne’e,” Lere Anan Timur hateten.

Jornalista: Rogério Pereira Cárceres