Motór ida ne’ebé akipa konjunta PNTL ho F-FDTL sira asegura bainhira kaptura suspeitu ho inisiál AP iha Darlau, Postu Administrativu Atsabe, Munisípiu Ermera, Segunda (16/01/2023). Foto/Elio dos Santos da Costa
Kazu omisídiu ne’ebé hakotu vítima Isaac Hornai Baptista nia vida ne’e akontese iha Sesta madrugada, 06 fulan-Janeiru 2023, hale’u tuku 02:00 Otl.
Informasaun ne’ebé Hatutan.com asesu hosi fonte ekipa sekreta sira katak suspeitu ho inisiál AP ne’e, parte PNTL ho F-FDTL kaptura iha área Darlau-hun, Postu Administrativu Atsabe, Munisípiu Ermera.
Advertisement
Molok kaptura suspeitu AP, iha Domingu (15/01/2023), ekipa konjunta PNTL ho F-FDTL lokaliza besik suspeitu nia subar fatin halo serku no buka tuir. Nune’e, Segunda (16/01/2023), ekipa sira kaptura kedas suspeitu.
Iha lokál kapturasaun, ekipa konjunta mós foti ho motór ida ne’ebé deskonfia suspeitu sira utiliza hodi bá “oho” matebian Isaac Hornai Baptista. Ekipa konjunta mós lori ho suspeitu nia alin ne’ebé hamutuk hela ho suspeitu.
Daudaun ne’e, suspeitu ho inisiál AP iha ona Polísia Nasionál Servisu Investigasaun Kriminál (PNSIK) iha Kuartél Jerál PNTL, Díli, hodi submete bá identifikasaun no investigasaun kriminál.