Hatutan.com, (24 Janeiru 2023), Díli— Primeiru Ministru (PM), Taur Matan Ruak preokupa ho situasaun konflitu ne’ebé kontinua akontese iha rai laran, liu-liu iha sidade Díli.
“Ita lakohi konflitu sira ne’e akontese bebeik iha ita nia rain, tanba konflitu ne’e nunka lori benefísiu ba ema ida, nem sira ne’ebé halo, nem sira ne’ebé sofre konsekuénsia. Entaun pelu kontráriu lakon tempu, lakon sasán barak,” Primeiru-Ministru hateten iha Palásiu Prezidensiál Nicolau Lobato, Bairru Pité, hafoin enkontru semanál ho Prezidente Repúblika, José Ramos-Horta, Tersa (24/01/2023).
Lee Mós: Konfrontu Iha Mascarenhas, PNTL Rekoñese Involve Hosi Membru PSHT ho 77
Xefe Governu akonsella no apela katak, nu’udár sidadaun tenke evita konflitu, husu ba institutusaun Estadu ne’ebé vokasionadu atu intervén iha konflitu sira ne’e lori suspeitu no autór sira ba responsabiliza sira nia aktu.
“Ita boot sira haree iha kazu rua, Elemloi autór ne’e kapturadu, kazu ponte Habibe mós ninia autór kapturadu,” subliña.
Taur Matan Ruak mós la permite ba kualkér sidadaun atu kria instabilidade iha nasaun ne’e tanba iha tempu besik sei realiza eleisaun Parlamentár 2023.
“Sa tán iha tinan ida-ne’e ita iha festa demokrasia rua tutuir malu, agora iha tempu oin mai eleisaun Parlamentár no eleisaun suku sira sei akontese iha fulan Novembru ka Dezembru,” Primeiru Ministru hateten.
Ohin mós Polísia Nasionál Timor Leste (PNTL) liu hosi Komandu Munisípiu Díli, rekoñese konfrontu iha área Mascarenhas, Segunda (23/01/2023) maizumenus tuku 18:26 lorokraik otl involve hosi membru arte marsiál PSHT ho arte rituál 77 ho evidénsia motór tolu mak hetan estragus.
Jornalista: Vito Salvadór
