Emanuel FC Prontu Kompete iha Liga Timorense Époka 2022-2023

Hatutan.com, (25 Janeiru 2023), Díli- Prezidente Klube Primeira divizaun Emanuel Fc, Aleixo do Carvalho Monteiro, hateten Emanuel FC sei la halo kontratu ho jogadór estranjeiru, maibé sei fó oportunidade bá jogadór rai-laran ne’ebé iha talentu no kualifikasaun di’ak iha selesaun nasionál atu reforsa Emanuel Fc hodi kompete iha liga Timorense époka 2022-2023.

Lee Mós : LFTL ho Klube Primeira-Segunda Divizaun Konkorda Realiza Liga Timorense Époka 2022-2023

Prezidente Emanuel Fc, Aleixo do Carvalho Monteiro. Foto/Elio dos Santos da Costa

Emanuel Fc ne’ebé ho naran estimadu ‘Armada Avansa’ oras ne’e iha faze preparasaun no selesaun bá jogadór nasionál sira ne’ebé iha talentu no kualifikasaun di’ak, atu prienxe kompozisaun no liña ne’ebé treinadór prinsipál presiza hahú hosi baliza bá too iha liña avansadu.

Hafoin rona novidade di’ak hosi soru-mutu triparte ne’ebé realiza entre Sekretáriu Estadu Juventude no Desportu (SEJD), Federasaun Futeból Timor-Leste (FFTL) no Liga Futeból Timor-Leste (LFTL), Armada Avansa ne’e hahú halo preparasaun, liuliu kontaktu treinadór no jogadór sira hodi tjuur hamutuk, atu oinsá iha forsa hodi tuir kompetisaun liga Timorense époka 2022-2023.

Prezidente Emanuel Fc, Aleixo do Carvalho Monteiro hateten, Emanuel Fc prontu ona atu tuir kompetisaun liga Timorense époka 2022-2023, bainhira Federasaun Futeból Timor Leste (FFTL) no órgaun Liga Futeból Timor-Leste (LFTL) prontu ona atu realiza liga ba tinan ida ne’e.

Dezde Emanuel Fc harii, laiha Jogadór estranjeiru tamba em-prinsípiu hakarak apoiu Jogadór nasionál no Timoroan sira ne’ebé iha talentu, atu hosi sira Timor-Leste bele hetan Jogadór nasionál ne’ebé di’ak uainhira reforsa selesaun nasionál bá iha jogu rejionál no internasionál sira.

Iha tempu badak mós Emanuel Fc sei submete nia lista jogadór hamutuk ho treinadór bá iha órgaun liga hodi halo inskrisaun atu hetan legalidade hodi partisipa iha liga époka 2023.

Tuir dadus ne’ebé Hatuta.com asesu husi pájina ofisiál LFTL katak klube hamutuk sia (9) mak halo ona rejistrasaun Jogadór bá iha órgaun liga mak hanesan primeira divizaun kompostu husi Assalam Fc,  Ponta Leste Fc, Coração Fc, Karketu Díli Fc, no klube segundu divizaun ne’ebé rejistu ona mak hanesan DIT Fc, Fitun Estudante Fc, Kablaki Fc, Nagarjo Fc, Lica-Lica Lemorai Fc.

Jornalista: Vito Salvadór