Hatutan.com, (25 Janeiru 2023), Díli— Ministru Transporte no Komunikasaun (MTK), José Agustinho da Silva halo ona ezonerasaun ba Lamartinho de Oliveira hosi ninia kargu hanesan Prezidente Konsellu Administrasaun Autoridade Portuário Timor Leste (APORTIL).
Tuir despaixu númeru 0037/GMTC/1/2023 ne’ebé asina hosi Ministru Transporte no Komunikasaun, José Agustinho da Silva iha loron 17 fulan Janeiru 2023, deside hodi hahú prosesu disiplinár hasoru Lamartinho de Oliveira hanesan Prezidente Konsellu Administrasaun Autoridade Portuário Timor Leste (APORTIL) no hapara hosi kargu ida-ne’e.
Iha despaixu ne’e Ministru José Agustinho foti desizaun tanba Lamartinho de Oliveira la obedese ba estatutu APORTIL nian durante hala’o jestaun ba instituisaun Estadu ne’e.
Tanba ne’e, hanesan Ministru tuteladu, ho nia kompeténsia tomak foti desizaun atu halo prosesu disiplinár.
Iha despaixu ne’e mós Ministru José Agustinho konsidera katak, sansaun bá Lamartinho de Oliveira ne’e feita iha ámbitu prosesu disiplinár ida no Ministru foti bazeia bá kompeténsia iha Lei (Alinea a), númeru 4 artigu 55 Dekretu Lei númeru 30/2020 29 Jullu.
Desizaun ba demisaun ne’e mós bazeia ba estatutu APORTIL nian, númeru 1 artigu 3 ne’ebé tutela bá Ministériu Transporte no Komunikasaun.
Tanba ne’e, Ministru MTK foti desizaun bazeia ba Estatutu APORTIL númeru 1 artigu 3 ne’ebé aprovadu hosi Dekretu Lei númeru 3/2003, 10 Marsu, númeru 2 artigu 11 ho númeru 4 artigu 3 Dekretu Lei númeru 30/2020, 29 Jullu mak hanesan, Determina hodi hahú prosesu disiplinár ba Prezidente Konsellu Administrasaun APORTIL Lamartinho de Oliveira liu hosi demisaun hosi Kargu ne’e.
Alende ne’e, atu substitui Lamartinho de Oliveira iha kargu ne’e hanesan Prezidente APORTIL interinu, liu hosi despaixu ne’e Ministru José Agustinho nomeia hikas vogál 2 maka Tito da Costa Freitas Morreira, hodi assume hikas interinamente to’o prosesu ne’e remata.
Kona-bá asuntu ne’e Hatutan.com konfirma ho Prezidente Bankada Partidu Kmanek Haburas Unidade Timor Oan (KHUNTO) hanesan mós kuadru Partidu KHUNTO, Deputada Olinda Guterres rekoñese katak, asuntu demisaun ne’e loos duni tanba antes ne’e Deputada Olinda rasik mak husu.
“Ne’e uluk kedan ha’u mak husu tenke hasai duni hosi ne’ebá tanba ema iha Parlamentu informa beibeik bá ami katak iha mál jestaun ba ita nia portuáriu,” Olinda Guterres hateten ba Hatutan.com via telefónika.
Maski la esplika detalla kona-bá tipu mál jestaun ne’ebé Lamartinho de Oliveira komete, maibé Olinda subliña katak, durante Asume kargu hanesan Jestór prinsipál APORTIL sempre fó orientasaun ne’ebé fora hosi estatutu APORTIL nian.
To’o notisia ne’e públika, Hatutan.com esforsu hodi ba buka Lamartinho de Oliveira iha APORTIL maibé laiha fatin, inklui halo kontantu dala barak via telefónika hodi konfirma kona-bá despaixu ne’e, infelizmente la atende telephone.
Jornalista: Rogério Pereira Cárceres
