Dezenvolvimentu F-FDTL Konta Ho Apoiu Hosi Veteranu Sira

Hatutan.com, (31 Janeiru 2023), Díli—Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’ hateten, veteranu sira la’ós de’it sira ne’ebé sei ativu iha vida militár, maibé mós sira ne’ebé iha ona liur, sempre fó nafatin hanoin di’ak no kontribuisaun bá dezenvolvimentu forsa armada.

Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’.

“Iha ne’ebé de’it mós, sira fó nafatin kontribuisaun. Reforma uluk iha Aileu, sira ne’ebé reforma mós, fó kontribuisaun maka’as bá iha baze, apoiu komunidade, apoiu autoridade sira, dala-barak iha buat ruma sira fó hanoin mai, bolu sira mai iha ne’e atu fó apoiu nafatin ita. Sira ida ne’ebé uluk fó an atu kontribui nasaun ida-ne’e, sira atu husik ne’e labele. Sira tenke halo serbisu, to’o ne’ebé de’it, bele halo. Ida-ne’e mak lorloron imi haree,” Falur Rate Laek hateten iha kna’ar fatin Kuartél Jenerál Fatuhada, Dili, Tersa (31/01/2023).

Lee Mós: Membru F-FDTL Labele Intervein Servisu Seguransa

Kona-bá aplikasaun reforma hosi komandu bá veteranu sira, Falur Rate Laek sei elabaora hela diretiva ida, depois liuhosi diretiva ne’e mak sei halo fali sosializasaun Lei kona-bá Reforma no Rezerva ninian, tanba Governu anunsia ona despaixu ida ne’ebé publika iha Jornál Repúblika.

“Sosializasaun ne’e atu sira ne’ebé defisiensia ona, tama ona idade reforma ne’e bele iha rejenerasaun bá instituisaun ne’e nune’e bele moris, bele dezenvolve. Sira ne’ebé idade avansadu ne’e, iha ne’e ha’u iha lista ida, sira hamutuk 60-resin,” Falur Rate Laek hateten tán.

Iha loron 02 fulan-fevereiru tinan ne’e, instituisaun armada ne’e kompleta nia aniversáriu transformasaun hosi FALINTIL ba FDTL bá dala-22.

Jornalista: Rogério Pereira Cárceres