Polítika
Koligasaun Pre-Eleitorál, CNRT Aprende ho Erru Rasik
Hatutan.com, (03 Fevereiru 223), Díli- Partidu Congresso Nacional de Raconstrução de Timor (CNRT) sei la halo koligasaun pre-eleitorál tanba aprende rasik ho nia erru sira iha tinan 2018.
Lee Mós : PLP Hakarak Eleisaun Ida Ne’ebé Kualidade
Prezidente partidu CNRT, Kay Rala Xanana Gusmão, afirma koligasaun pre-eleitorál ne’e ‘kesi-malu’ to’o balun husi kargu Vise-Primeiru-Ministru mas la sukat ho kapasidade no la sukat ho rekursu umanu iha partidu nia laran rasik.
Prezidente partidu CNRT, Kay Rala Xanana Gusmão. Foto/Elio dos Santos da Costa
Prezidente partidu Kay Rala Xanana Gusmão hato’o deklarasaun ne’e relasiona ho akontesimentu koligasaun pre-eleitorál iha eleisaun 2018 iha ne’ebé partidu tolu hanesan Partidu Libertasaun Populár (PLP), Partidu Kmanek Haburas Unidade Nasionál Timoroan (KHUNTO) no CNRT rasik forma plataforma AMP, maibé hafoin eleisaun mosu ezijénsia barak liuliu ba iha formasaun governu iha ne’ebé la reflete ho rekursu umanu ne’ebé partidu plataforma iha.
“Koligasaun pre-eleitorál ne’e kesi ita metin loos, eleisaun tiha ita labele book an ona tamba atu forma Governu mai husu vise Primeiru-Ministru buat sira ne’e hotu komplikadu tebes-tebes, ita labele, CNRT aprende ho nia erru rasik, laiha koligasaun pre-eleitorál, bá eleisaun povu mak hili, povu hili tiha mak ita haree,” Xanana Gusmão hateten bá jornalista sira hafoin hamutuk ho membru Komisaun Polítika Nasionál (CPN) partidu CNRT hasoru malu ho Prezidente Repúblika iha Palásiu Prezidensiál, Sesta (03/02/2023) .
Relasiona markasaun bá kalendáriu eleisaun parlamentár 2023, Xanana ho CNRT sujere bá Xefe Estadu atu kumpre regra sira eleisaun nian ne’ebé kada tinan lima fulan-Maiu halo eleisaun parlamentár.
Komisaun Polítika Nasionál Partidu CNRT. Foto/Elio dos Santos da Costa
“Ami hato’o ami nia hanoin, Prezidente Repúblika mós ko’alia kona-bá haree bá situasaun no buat sira ne’e hotu, ami hare katak, ami halo apelu ida bá prezidente katak tuir siklu eleitorál kada tinan lima, se iha 2018 hala’o eleisaun iha fulan-Maiu, siklu eleitorál ne’e iha fulan-Maiu 2023 tenke hala’o eleisaun parlamentár,” Kay Rala Xanana Gusmão hateten.
“Prezidente Repúblika rona ona CNRT nia opiniaun no agora ita hein de’it bainhira mak Prezidente Repúblika atu marka loron eleisaun,” Xanana tenik.
Lee Mós : PD Sempre Preparadu Bainhira Xefe Estadu Dekreta Loron Eleisaun
Jornalista: Vito Salvadór