Prezidénsia Repúblika-CARE Internasionál Hakarak Hadi’a Edukasaun ho Nutrisaun Labarik

Hatutan.com, (03 Fevereiru 2023), Díli—Prezidénsia Repúblika ho CARE Internasionál assina akordu kooperasaun iha área prioridade sira ba kuidadu edukasaun, saúde, nutrisaun no mós empoderamentu ekonómiku feto nian.

Xefe Kaza Sivíl, Bendito dos Santos Freitas ho Diretór CARE Internasionál, Peter Goodfellow assina akordu kooperasaun iha área prioridade sira ba kuidadu edukasaun, saúde, nutrisaun no mós empoderamentu ekonómiku feto nian, iha Palásiu Prezidensiál Nicolau Lobato Bairru-Pité, Sesta (03/02/2023). Foto/Média PR.

Xefe Kaza Sivíl, Bendito dos Santos Freitas hateten, serimónia asinatura akordu ida-ne’e importante ba atividade ne’ebé refleta partisipasaun Prezidensia Repúblika ho CARE Internasionál durante tinan rua, iha área sira ne’ebé importante liu-liu edukasaun bá kiik oan sira.

Lee Mós: Ramos-Horta Husu Sentru Komérsiu Internasionál Apoia Formasaun bá Rekursu Umanu TL

“Mapa intervensaun CARE nian prodúz kualidade ida di’ak no hatudu diferensa katak, estudante sira ne’ebé prátika leitura ba revista Lafaek kiik ho magazine sira hatudu kualidade di’ak, iha rezultadu sira nia leitura ida-ne’e importante tebe-tebes. Hosi ita nia servisu hamutuk ne’e atu bele la’o di’ak liu tán no promove edukasaun, saúde, no mós empoderamentu feto nian,” Xefe Kaza Sivíl hateten hafoin asina akordu iha Palásiu Prezidensiál Nicolau Lobato Bairru-Pité, Sesta (03/02/2023).

Prezidénsia Repúblika sei haforsa kompromisu atu atinje prioridade dezenvolvimentu xave sira ho parseria hamutuk ho CARE liu-liu iha área edukasaun no nutrisaun ba labarik.

Diretór CARE Internasionál, Peter Goodfellow hateten parseria ida-ne’e dezenvolve ona atu responde ba Prezidente nia kompromisu hodi halo mudansa iha área hirak ne’e, no hametin liu tán ho CARE nia esperiénsia, kapabilidade atu lori programa sira foka ba kualidade edukasaun, saúde no igualdade jéneru ho eskala bo’ot.

Iha Timor-Leste, CARE koñesidu ho ninia suporta ba seitór edukasaun, partikularmente atu hadi’ak literasia, numerasia no kualidade hanorin, hadi’ak nutrisaun liu hosi promove pratika dieta saudável ba kanorin eskola primária sira, liu hosi programa sira hanesan Lafaek Learning Media no programa Edukasaun no Nutrisaun HATUTAN.

Feto nia empoderamentu ekonomia sai sentru ba CARE nia programa sira no ida-ne’e atinje liuhosi responde ba imbalansu podér iha uma-laran no komunidade nia leet, haforsa asesu ba formasaun hadi’ak abilidade tekniku, no dezenvolve koneksaun di’ak ba merkadu.

Parseria ida-ne’e sei válidu ba tinan rua no sei ajuda halu’an tán inisiativa dezenvolvimentu sira ne’ebé eziste ona no hirak ne’ebé iha futuru iha área rurais no remotas iha rai-laran.

Ida-ne’e inklui atividade espesífiku, pratikal no komplementáriu, hanesan promosaun atu enkoraza lee iha uma, promosaun tein hahan nutritivu, no suporta feto sira nia lideransa no foti-desizaun iha nivel suku.

Jornalista: Vito Salvadór